Jepi trawan foe „ondrow den sani di skrifi”
1 A no de nofo foe „jere” den wortoe foe den profeititori foe a boekoe foe Openbaring. Foe kisi dorodoro wini, wan sma moesoe „ondrow” san skrifi (Openb. 1:3). Foe libi wan poeblikâsi na baka, na soso wan fosi stap ini a meki di wi e meki disipel. Te wi feni sma di abi belangstelling èn di wani arki, dan wi moesoe go baka wantewante foe jepi den foe leri moro. Sortoe sani wi kan taki te wi e go baka?
2 Efoe joe ben taki foe den simbôlis fo asi-tjariman na joe fosi fisiti, dan joe ben sa kan bigin joe takimakandra na a fasi disi:
◼ „A fosi leisi wi ben taki foe a boekoe foe Openbaring èn fa den profeititori di de na ini, e kon troe ini den sani di e pasa now na grontapoe. Openbaring kapitel 6 ben taki na fesi foe a rèi di den simbôlis fo asi-tjariman ben o rèi, èn dati ben o abi leki bakapisi foeroe ogridoe èn kwinsi na grontapoe. Wi si disi pasa leti bifo wi eigi ai. Foeroe sma e aksi densrefi o ten a kwinsi disi o kaba, so taki wi kan njan boen foe a libi na ini wan grontapoe pe vrede de. Fa joe e denki foe disi? [Gi okasi foe piki.] Den disipel foe Jesus ben abi belangstelling ini a piki na tapoe na aksi disi.” Leisi Mateus 24:3, pe den poti na aksi, èn dan leisi vers 34 pe Jesus ben gi a piki. Efoe a piki foe a sma de positief, dan froeteri moro foe den lasti dei.
3 Efoe joe ben taki foe Gado Kownoekondre na joe fosi fisiti, dan joe kan bosroiti foe go doro, foe di joe e aksi na aksi disi:
◼ „Ini joe fasi foe denki, sortoe fasi foe tiri de fanowdoe foe satisferi ala den sani di libisma abi fanowdoe? [Gi okasi foe piki. Leisi Jeremia 10:23.] Soleki fa joe kan si, dan Gado noiti ben abi ini prakseri taki sma ben moesoe tiri densrefi. A moro prenspari reide foe den problema foe wi, na foe di sma e proeberi foe doe sani densrefi, sondro a jepi foe Gado. A Kownoekondre foe Gado na a wan-enkri tiri di kan gi wi san wi abi fanowdoe.” Go na bladzijde 246 te nanga 247 foe a Redeneren-boekoe (Taki-go-taki-kon-boekoe), èn taki foe den tekst di e tanapoe na ondro a lasti ede penti. Go doro nanga a takimakandra foe di joe e tjari kon na krin foe san ede wi kan poti ala wi froetrow tapoe Gado.
4 Kande joe wani foe proeberi a fasi disi foe bigin wan takimakandra di gron tapoe bijbel:
◼ Sori a prenki tapoe bladzijde 302 foe na Openbaring-boekoe, èn tjari kon na krin: „Sma sa njan boen foe den kondisi disi te a wani foe Gado sa doe na grontapoe, soleki fa a de na hemel. Ma, son sma frede taki den takroe kondisi sa kon baka ete wan tron. Dati na wan sani di no kan foe di ala den ogriwan no sa de moro.” Leisi Psalm 37:10, 11. Gi na ososma wan kari foe meki boen gebroiki foe a bijbelstudie programa foe wi, so taki a kan leri moro.
5 Efoe joe ben libi a traktaat „Libi na ini wan njoen grontapoe pe vrede de” na baka, dan sori go na a prenki na fesisei foe a traktaat èn leisi paragraaf 1 ondro a nen: „Libi na ini a njoen grontapoe foe Gado”. Taki dan:
◼ „Efoe wi wani foe libi na ini wan grontapoe leki dati, dan wan prenspari sani de di wi moesoe doe.” Leisi a lasti paragraaf foe a traktaat, èn pristeri na Openbaring-boekoe.
6 Sensi a marki foe wi de foe bigin bijbelstudie, dan a de fanowdoe foe wi meki gobaka nanga boen bakapisi. Poti ten na wan sei foe meki gobaka èn sreka joesrefi boen. Na a fasi disi troetroe wi kan jepi den opregti-atisma.—Openb. 22:6, 7.