Meki ’den wortoe foe a profeititori’ bekènti
1 Wi e libi na ini wan ten pe den profeititori foe a boekoe foe Openbaring e kon troe. Foeroe sma wani sabi san den sani di e feni presi na grontapoe now èn di e gi sma broko-ede, wani taki. Den kan kisi wini efoe den ’arki den wortoe’ foe a profeititori foe Openbaring (Openb. 1:3). Na ini a moen maart wi abi na okasi foe jepi den, foe di wi sa pristeri na Openbaring-boekoe. Te wi e pristeri a boekoe, wi moesoe hori na prakseri taki a boekoe foe Openbaring ben taki na fesi foe den problema di sma e ondrofeni now. San wi kan taki dan?
2 A fasi disi foe bigin ben sa kan abi boen bakapisi:
◼ „Feti, angriten, nanga siki, trobi sma na ini a di foe twenti jarihondro disi. Foe san ede joe e denki taki dati de so, te libisma go na fesi so foeroe tapoe a gron foe teknik? [Gi okasi foe piki.] Foeroe sma e froewondroe te den e leri taki bijbel ben taki na fesi foe ala den sani disi. Kande joe sabi den wortoe: ’den fo asi-tjariman foe Openbaring’. San bijbel e taki foe den asi-tjariman disi, na, te joe loekoe en boen, wan profeititori di feni en kontroe na ini den sani di e pasa now na grontapoe. [Opo kapitel 16 foe na Openbaring-boekoe, èn sori go na den prenki na tapoe bladzijde 91 te nanga 97.] Ala di a profeititori disi e taki na fesi foe wan ten foe bigi banawtoe, a e gi howpoe toe. [Leisi Openbaring 6:2 na ini paragraaf 3.] Na asi-tjariman na tapoe a weti asi na Jesus Krestes. A pramisi foe wini ogridoe èn foe tjari wan grontapoe foe kolokoe nanga vrede kon nanga jepi foe a Kownoekondre, di a ben leri wi foe begi.” Pristeri a boekoe.
3 Kande nanga na aksi disi joe kan wiki a belangstelling foe a sma, so taki joe ben sa kan abi wan takimakandra di wani taki wan sani:
◼ „San joe e denki, de fanowdoe foe poeroe den takroe situwâsi foe grontapoe? [Gi okasi foe piki.] Moro foeroe sma e agri taki wi abi troetroe kenki fanowdoe efoe wi wani dati a grontapoe disi e tan. Bijbel e sori taki Gado sabi fa foe loesoe den problema foe wi, èn taki a pramisi foe jepi wi.” Go na a Openbaring-boekoe, bladzijde 171, èn leisi Openbaring 11:15 na ini paragraaf 1. Go na den prenki na tapoe bladzijde 302 nanga 308, èn sori go na den blesi di sa kon na ondro a Kownoekondre tiri foe Krestes. Dan tjari kon na krin fa na ososma persoonlijk kan kisi wini.
4 Joe ben sa kan firi boen foe di joe e taki wan sani leki disi:
◼ „Foeroe sma di leisi a Bijbel boekoe Openbaring ben feni en moeilek foe froestan. A e taki foe difrenti toemoesi aparti nanga prenspari sani di pasa. A boekoe disi, De Openbaring—Haar grootse climax is nabij! (Na Openbaring—En moro bigi heimarki de krosibei!), e loekoe nanga wi den vers foe a heri boekoe Openbaring wan froe wan, èn a e sori fa a kontroe foe den profeititori abi krakti na tapoe ibriwan foe wi persoonlijk.” Opo a boekoe na bladzijde 15, paragraaf 2, èn sori go na Openbaring 1:1, di skrifi nanga deki letter. Tjari kon na krin taki spesroetoe komentaar leki den disi, e gi tapoe ibri vers na ini a boekoe Openbaring èn taki a bodoi disi sa jepi en foe froestan den toemoesi aparti profeititori disi. Efoe den sma e piki boen na tapoe dati, dan aksi den efoe joe kan libi a boekoe na baka.
5 Efoe a sma abi foeroe foe doe noso joe no de seiker efoe a abi nofo belangstelling, dan joe ben sa kan libi wan tijdschrift noso wan traktaat na baka. Te joe e go baka èn a sma e sori belangstelling, dan joe ben sa kan pristeri a boekoe.
6 A boskopoe di wi kan feni na ini Openbaring abi krakti na tapoe ala libisma. Ala sma moesoe jere den wortoe foe a profeititori. Meki wi doe ala san wi man foe meki a prenspari boskopoe disi bekènti.