A moro prenspari sani di pasa ini a historia foe libisma
1 Soleki fa en Tata ben taki, dan Jesus ben kon na grontapoe foe gi kotoigi foe waarheid di ben sa tjari wi go na a têgo libi (Joh. 18:37). A getrowfasi foe en te na dede, ben gi Jehovah grani, a ben santa en nen èn a ben sorgoe gi a froeloesoe-ofrandi (Joh. 17:4, 6). Disi na san ben meki a dede foe Jesus a moro prenspari sani di pasa na ini a heri historia foe libisma.
2 Foe sensi Gado ben meki Adam, dan soso toe volmaakti sma ben de di libi na grontapoe. Adam ben de na ini wan posisi foe tjari toemoesi moi blesi kon gi den bakapikin foe en, di no ben gebore ete. Na presi foe dati, na wan fasi pe a ben prakseri soso ensrefi nomo, a ben opo ensrefi teige Gado. Nanga disi a tjari wan kroetoe kon gi den bakapikin foe en, èn dati ben abi leki bakapisi wan mofina libi di ben sa feni en kaba na ini dede. Di Jesus ben kon, a ben sori volmaakti loyaalfasi èn a ben gi jesi. A ben opo na okasi gi têgo libi gi ala sma di e sori bribi.—Joh. 3:16; Rom. 5:12.
3 Joe no kan teki no wan tra sani di pasa, gersi nanga a dede foe Jesus di a ben tjari a slakti-ofrandi . A dede disi ben kenki a pasi foe libisma historia. A ben de wan fondamenti foe opo miljardmiljard sma baka foe dede. A ben poti a fondamenti gi wan têgo Kownoekondre di ben sa tjari ogridoe kon na wan kaba, èn ben sa meki grontapoe kon tron wan paradijs. Te foe kaba, a sa fri ala libisma foe ibri sortoe foe kwinsi èn foe a de di den de ini katibo.—Ps. 37:11; Tori. 24:15; Rom. 8:21, 22.
4 Ala disi e jepi wi foe froestan foe san ede Jesus ben gi den disipel foe en a komando foe memre a dede foe en nanga a Memrefesa ibri jari baka (Luk. 22:19). Foe di wi e warderi san a wani taki, meki wi e loekoe go na fesi foe kon makandra nanga den gemeente foe Jehovah Kotoigi na heri grontapoe tapoe freida 14 april, baka sondongo. Bifo a ten dati, a ben sa de boen foe leisi makandra leki osofamiri den bijbel pisi foe den lasti dei foe Jesus na grontapoe èn fa a ben tanapoe na wan deki-atifasi gi waarheid (Den pisi di wi kan leisi skrifi na tapoe wi Kalender foe 1995, foe 9 te nanga 14 april.) A ben poti wan model gi wi ini a gi di wi moesoe gi wisrefi na a dini foe wi Mekiman (1 Petr. 2:21). Meki wi doe ala san wi man foe gi wi mati nanga wi famiriman wan kari gi a prenspari konmakandra disi. So srefi, wi kan gi bijbelstudenti èn tra sma di abi belangstelling wan kari toe. Froeteri na fesi san sa feni presi èn san a brede nanga a win wani taki.—1 Kor. 11:23-26.
5 Den owroeman moesoe meki plan na fesi foe sorgoe taki a Kownoekondrezaal e loekoe boen èn dati a de krin. Den moesoe seti sani so toe, taki wan sma kan go teki a brede nanga a win. A meki di den sa meki a brede nanga win pasa na ini a heri zaal, moesoe orga boen. Rai di kan jepi wi foe sori respeki gi na Avondmaal foe Masra, ben gi na ini A Waktitoren foe 15 februari 1985, bladzijde 10. A ben sa fiti foe a gemeente seti sani gi moro velddienst aktiviteit wan toe dei bifo a fesa èn wan toe dei baka a fesa.
6 A jari di pasa, wan nomroe foe 12.288.917 sma na heri grontapoe ben de tapoe a Memrefesa a prenspari sani disi di pasa. Foe di a de a moro prenspari dei na tapoe wi kalender, dan wi alamala moesoe de drape.