Krestes leki wan eksempre gi jongoewan
1 Baka wan boen langa bijbel takimakandra, wan jongoewan ben taki: „A krakti persoonlijkheid foe Jesus ben naki mi ati. Disi na wan tiriman di mi ben kan froetrow.” Wi no kan taki a srefi foe no wan foe den politiekman noso foe den sport nanga ontspanning barinen man. Troetroe kresten no e si den wan leki eksempre di e hori grontapoe markitiki èn den fasi foe libi di no de akroederi a kresten libi.—Ps. 146:3, 4.
2 Jongoe sma kan de seiker taki te den kon sori bribi na ini Jesus Krestes, dan den e pristeri densrefi leki skapoe foe Gado èn Jesus sabi den. A toemoesi boen Skapoeman e sorgoe gi den (Joh. 10:14, 15, 27). Jongoewan di e waka baka Krestes leki na Eksempre foe den, e kisi blesi.
3 Wan brada di e dini na Bethel na Brooklyn now, ben poti a grani disi foe diniwroko leki wan marki gi ensrefi foe sensi a ten di a ben abi aiti jari. A ben kisi a deki-ati foe si Bethel diniwroko leki wan praktis fasi foe waka baka na eksempre foe Jesus te a ben kon moro bigi. En papa nanga mama èn so srefi den opziener di e rèis, ben hori a marki disi na en fesi. Foe jepi en foe teki sreka, den ben gi en deki-ati foe de fajafaja neleki wan memre foe a Bethel famiri, foe doe wan toe oso wroko, foe jepi foe ondrow a Kownoekondre zaal, èn foe kweki bekwaamfasi na ini a diniwroko. Now, baka di a njan boen foe Bethel diniwroko wan toe jari kaba, a de nanga tangi dati di a ben gro kon bigi, a ben meki moeiti foe waka baka na eksempre foe Krestes.
4 Jesus no ben feti na baka wan grontapoe libiwroko; a ben froekisi a diniwroko. Wan jongoe sisa ben wani pionier baka di a ben kisi en skoro papira, ma a ben tweifri foe di a no ben feni wan boen pisi-ten wroko. A ben tan prakseri: ’Mi wani feni wan wroko fosi, baka dati mi sa gi mi formulier foe tron wan pionier.’ Wan owroeman ben tjari kon na krin taki o moro langa a ben o wakti, o moro betre foeroeten wroko ben sa sori gi en, foe di a no ben sa abi noti di sa hori en foe no teki en. A ben froeteri: „Mi ben begi Jehovah foe a meki en jeje tiri mi.” Wantewante a sisa ben gi en nen foe tron jepi-pionier èn bakaten a ben kon tron wan gewoon pionier. Wan sjatoe pisi ten baka dati, a ben feni wan boen wroko di ben fiti na ini en pionier schema.
5 Jesus ben meki a Kownoekondre boskopoe bekènti gi ala sma na wan fajafaja fasi, sondro frede (Mat. 4:23). Den jongoe kresten kan leri toe foe de fajafaja èn sondro frede na ini a preikiwroko, foe di den no e meki trawan tapoe skreki gi den. Wan Kotoigi boi di abi 14 jari ben taki: „Ala sma na skoro sabi mi posisi leki wan kresten . . . Den sabi dati so boen, taki te mi miti wan skorokompe di e sidon na ini a srefi klas foe mi, na ini a diniwroko, dan mi no e sjen. Foeroetron den skorokompe e arki, èn nofo tron den e teki poeblikâsi.”
6 Te joe e loekoe na eksempre foe Jesus, dan disi kan jepi jongoe sma foe teki koni bosroiti di abi foe doe nanga a ten di de na den fesi. Na presi foe broko den ede nanga san grontapoe e feti na baka, den ’e memre a Bigi Mekiman foe den’ foe di den de fajafaja na ini a diniwroko foe Jehovah (Preik. 12:1). Neleki Krestes Jesus, den e kweki „a lobi gi a Tata”, di e tjari blesi kon di sma wani troetroe moro leki ala sani di grontapoe e pristeri. Na presi foe „pasa gowe” nanga na owroe grontapoe, den kan loekoe go na fesi foe ’tan foe têgo’.—1 Joh. 2:15-17.