Taki sondro foe frede
1 Na ini den jari di no pasa so langa, preikiman na ini wan toe gebied e feni taki a kon moeilek moro nanga moro foe miti sma na oso. Foeroe foe den e taki dati na ini den gebied moro leki afoe foe den sma no de na oso te den e go oso foe oso. Leki bakapisi foe dati, den e lasi foeroe ten foe soso.
2 Foeroe jari pasa joe ben e feni foeroe sma na oso na tapoe sonde, a dei di foeroe sma ben e si leki wan rostoe dei. Ten kon drai. Now a de wan ala dei sani gi sma na ini a ten disi foe de na wroko, sorgoe gi den sani di den oso-famiri abi fanowdoe soleki bai sani na winkri, noso foe abi ontspanning, sani di e meki den no de na oso. So boen, srefi tapoe den sonde, a kon de wan problema foe miti sma na a oso foe oso wroko.
3 Te sma no de na oso, a de krin taki den de na wan tra presi. Foe di a marki foe wi de foe taki nanga sma, foe san ede wi no e taki nanga den wan di wi e miti na strati, na wowojo, noso na wrokope. A ben de a gwenti foe Paulus foe taki nanga „den wan di ben de drape tapoe a momenti dati” èn foe gi den kotoigi (Tori. 17:17). Na a ten dati, a ben sori taki disi ben de a fasi foe gi kotoigi di ben abi boen bakapisi èn te now ete, a de wan fasi foe gi kotoigi di abi boen bakapisi.
4 Te wi e go oso foe oso, wi gwenti foe si sma e waka pasa tapoe a momenti dati noso kande e tanapoe e wakti tapoe wan tra sma. Tapoe wan moi dei, kande den e sidon tapoe wan bangi foe wan park, noso e meki noso e wasi a wagi foe den. Kande wan switi lafoe nanga wan switi odi na ala san de fanowdoe foe wi bigin wan takimakandra. Efoe den e libi na ini a birti, wi ben kan taki srefi dati kande wi no miti den na den oso èn taki now wi breiti dati wi abi na okasi disi foe taki nanga den. Foe di foeroe sma ben doe pikin moeiti foe teki fesi èn sori taki den no e frede, meki den njan boen foe ondrofenitori di abi boen bakapisi.
5 Taki sondro foe frede abi boen bakapisi: Wan brada ben froeteri taki a ben waka miti sma di e tanapoe, sma di e wakti bus, sma di e koiri, noso sma di e sidon na ini a wagi foe den. Nanga wan switi lafoe èn wan switi sten, a e doe leki a de wan birtisma di abi switifasi èn di wani foe tjari wan fisiti nomo. Tapoe so wan fasi a no ben prati foeroe boekoe nomo, ma a ben bigin difrenti bijbelstudie toe.
6 Wan tra brada nanga en wefi ben preiki oso foe oso di den ben miti nanga wan oema di ben e tjari wan bigi tas nanga njanjan sani. Den ben bigin wan takimakandra èn ben prèise na oema foe a moeiti di a e doe foe sorgoe gi den sani di en osofamiri abi fanowdoe. „Ma soema”, den ben aksi, „kan sorgoe gi den fanowdoe foe a libisma famiri?” Dati ben wiki a belangstelling foe na oema. Wan sjatoe takimakandra ben meki den kisi wan kari foe fisiti en na oso, pe den ben bigin nanga wan bijbelstudie.
7 So boen, a tra leisi te joe e gi kotoigi oso foe oso, awinsi tapoe sonde noso tapoe wan tra dei na ini a wiki, èn joe si taki sma no de na oso, foe san ede joe no e teki pikinso moro deki-ati foe taki sondro frede nanga den sma di joe e miti na strati noso na tra presi? (1 Tes. 2:2) Joe kan abi wan diniwroko nanga moro boen bakapisi èn joe sa ondrofeni moro prisiri na ini a diniwroko foe joe.