Meki waarheid bekènti leki bakaman foe Jesus ala dei
1 Jesus ben abi wan spesroetoe wroko foe doe di a ben kon na grontapoe. A ben de nomo: ’Foe gi kotoigi foe waarheid’ (Joh. 18:37). A ben meki waarheid bekènti foe den toemoesi moi eigifasi nanga prakseri foe en Tata. A wroko disi ben de leki njanjan gi en; en heri libi ben e drai lontoe a wroko dati (Joh. 4:34). Lukas ben froeteri taki Jesus ben tan „gi leri na ini a tempel ala dei” (Luk. 19:47). Jesus ben gebroiki a ten di a ben abi dorodoro (Joh. 9:4). Sjatoe fosi en dede, a ben man foe taigi en Tata: „Mi ben gi joe glori na grontapoe, foe di mi kaba a wroko di joe ben gi mi foe doe.” — Joh. 17:4.
2 So srefi, te wi ati e foeroe nanga warderi foe ala den sani di Jehovah doe, dan dati e dwengi wi foe taki foe en ala dei. Wi e tron neleki den disipel foe Jesus di ben froeklari sondro frede: „Wi no man tapoe foe taki foe den sani di wi si èn jere” (Tori. 4:20). Dorodoro den ben taki foe Jehovah, foe di a verslag e froeteri taki „ala dei . . . den ben go doro sondro foe tapoe” (Tori. 5:42). Wi moesoe aksi wisrefi: ’Mi de wan bakaman foe mi Leriman Jesus?’
3 Preiki nanga a tranga fanowdoe na prakseri: Jesus ben taki na fesi taki, te a Kownoekondre boskopoe meki bekènti na heri grontapoe, „dan a kaba sa kon” (Mat. 24:14). Disi moesoe meki wi froestan krinkrin a prensparifasi nanga a tranga fanowdoe foe a wroko foe wi. Foe di a libi foe troetroe miljoenmiljoen sma de na ini kefar, wi no man feni no wan sani foe doe di de moro prenspari noso abi moro winimarki. Foe di a sistema disi e kon na wan kaba, dan dati e meki taki a ten di libi foe kaba a wroko disi kon moro sjatoe!
4 Den njoensoe di e kon na inisei e sori taki Jehovah e meki a tjari kon makandra foe sma di wi kan agersi nanga skapoe, pasa moro gaw (Jes. 60:22). Na foeroe kontren foe grontapoe, sma troetroe e kon ipi-ipi na ini waarheid, di, te joe loekoe en boen, e taki nanga prisiri: „Wi wani go nanga oenoe, foe di wi jere taki Gado de nanga oenoe!” (Zak. 8:23) Moro leki ini wan ten na ini a historia, den wortoe foe Jesus de troe: „A kotiwroko bigi, ma a no foeroe wrokoman de. . . . Aksi a Masra foe a kotiwroko foe dati ede foe seni wrokoman go doe a kotiwroko” (Mat. 9:37, 38). A sani disi no e gi wi tranga foe de nanga faja neleki den disipel foe Jesus di „doronomo ben de” na ini a tempel foe blesi Gado”? — Luk. 24:53.
5 Meki waarheid bekènti ala dei: Ala dei, wi moesoe soekoe fasi foe prati waarheid nanga trawan. Nofo okasi de foe doe dati. Joe ben kan teki wantoe miniti foe bèl wan mati noso wan sma di joe sabi èn foe soema joe denki taki a ben sa wani arki? Noso fa a de nanga a skrifi foe wan brifi gi wan sma di joe no ben man miti na oso? Joe prakseri foe pristeri wan traktaat gi wan winkriman te joe e bai sani? Kande, joe ben prakseri foe foeroe tra okasi di joe abi foe prati a howpoe foe joe nanga trawan ala dei. Efoe joe doe moeiti èn sori pikin moro deki-ati, dan Jehovah sa jepi joe. — 1 Tes. 2:2.
6 So boen, te wi e bigin nanga den wroko foe ibri dei, wi moesoe aksi wisrefi: ’Mi sa teki fesi foe prati a howpoe foe mi nanga trawan efoe wan okasi e opo tide?’ Waka na baka a fasi fa Jesus ben si sani, di ben froeklari foe san ede a ben seni kon na grontapoe: „Mi, moesoe meki a boen njoensoe foe Gado kownoekondre bekènti” (Luk. 4:43). Efoe wi wani de leki wi Leriman, wi sa doe a srefi sani. — Luk. 6:40.