San mi sa taki?
1 Difrenti reide kan de foe san ede wan ososma ben sa kan taki wan sani di ben kan tapoe a takimakandra. Ala di kande foeroe sma de opregti, tokoe trawan e wai pasi foe espresi gi wi, noso e proeberi foe no meki den pristeri foe wi abi boen bakapisi noso den e proeberi foe no meki wi go doro nanga wi pristeri. Efoe wi sabi den rai di gi na ini a Fa foe bigin èn go doro nanga bijbel takimakandra-brochure, dan wi kan sabi heri esi san na a situwâsi èn wi kan piki na wan joisti fasi (Odo 25:11; Jes. 50:4). Disi ben kan grati a pasi foe gi wan moi kotoigi di wi ben sa kan misi te wi no ben sreka foe miti nanga a tjalensi disi. Foe san ede joe no e poti serjoesoe prakseri na tapoe a fasi fa joe ben sa kan piki, te sma ben sa proeberi foe taki sani di den gwenti foe taki te den wani tapoe a takimakandra?
2 „MI NO ABI BELANGSTELLING”: Loekoe taki pikinmoro ala den piki di wi gi leki rai na tapoe bladzijde 8 foe a Fa foe bigin èn go doro nanga bijbel takimakandra-brochure abi foe doe nanga na aksi di wi moesoe aksi na ososma wan toe aksi di poti nanga takt, di de langalanga, èn di e poti sma na prakseri. Disi na wan boen fasi foe bigin foe di a e meki na ososma e taki. A kan sori san a e denki èn e firi. Na a tra sei, disi kan jepi joe foe go doro nanga a takimakandra.
3 Te wan sma e taki „mi no abi belangstelling”, oiti joe aksi: „Joe ben sa abi belangstelling efoe mi ben sa kan sori joe na ini bijbel fa ala ogridoe di doe nanga tranga, orlokoe, èn a span di de na mindri ras no sa de moro?” Proeberi en. Trawan ben abi boen bakapisi di den ben gebroiki den sortoe aksi disi.
4 „MI ABI FOEROE FOE DOE”: Soleki nanga ala den tra sani di sma e proeberi foe tapoe wan takimakandra, wi kan taki sjatoe taki wi e froestan taki a sma abi foeroe foe doe èn dan wi kan gebroiki en leki wan broki foe gi wan sjatoe boskopoe. Kande joe ben sa kan gebroiki a fosi rai na tapoe bladzijde 11: „Dan mi o meki en sjatoe. Mi kon na joe foe prati wán prenspari prakseri nomo nanga joe.” Froeteri na ede-prakseri foe a sani di joe wani taki na ini wan toe wortoe.
5 Te joe si taki na ososma abi foeroe foe doe troetroe, dan joe moesoe erken disi, èn joe kan poti wan aksi di e poti sma na prakseri èn joe kan aksi en efoe joe mag piki na aksi wan tra ten. Di wan preikiman ben gebroiki a lasti fasi di wi ben kari, dan na ososma ben kon soekoe a preikiman, foe di a ben wani wan piki wantewante na tapoe na aksi. Den sortoe bakapisi disi no warti a ten nanga den moeiti di wi ben sa kan doe foe sreka wisrefi gi problema di wi e miti na ini a diniwroko?
6 No gi pasi meki den sani di sma e taki foe proeberi foe tapoe den takimakandra, e meki den boen bakapisi foe joe diniwroko go na baka noso e kowroe a prisiri foe joe. Gebroiki a Fa foe bigin èn go doro nanga bijbel takimakandra-brochure boen, te joe e pristeri a boen njoensoe.