Gebroiki na Tak-go-tak-kon-boekoe na ini ala pisi foe joe diniwroko
1 Joe ben gebroiki na Tak-go-tak-kon-boekoe kaba na ini joe diniwroko? Sondro degedege joe ben loekoe kaba difrenti pisi èn e si dati a de wan toemsi boen boekoe. A no de foe taki dati a ben sa de boen foe lési a heri boekoe èn foe kon sabi den toemsi moi bodoi di a abi. Wan pionier e ferteri dati en nanga en oema e studeri ibri dé wan pisi foe a boekoe.
2 Ma a no de fanowdoe dati joe ben moe lési na heri boekoe bifo joe kan gebroiki en ini na oso foe oso wroko ofoe foe tjari gobaka èn foe hori osobijbelstudie.
POEROE GENS-TAKI NA PASI
3 A de so kande dati na ini na oso foe oso wroko alaten baka joe e jere bepaalde gens-taki. Den gens-taki disi kande e tapoe joe na ini a moeiti foe joe foe hori na belangstelling foe na ososma. Kande den e taki: „Mi no abi belangstelling”, „Mi abi en druk”, ofoe: „Mi abi mi égi bribi”. Te den sortoe moeiti disi foe tjari wan kaba kon na a takmakandra e tron wan ston tapoe joe pasi, teki dan séker wan momenti a ten foe poti joe prakseri pikinso tapoe wan ofoe moro rai tapoe bladzijde 15-24 foe na Tak-go-tak-kon-boekoe bifo joe go na a tra doro.
4 Foedi joe sabi den sma boen na ini na gebied, dan joe sa man foe feni wan piki di sa jepi joe foe taki go moro fara. Proeberi gebroiki densrefi wortoe di tanapoe na ini na Tak-go-tak-kon-boekoe. San tanapoe drape, den ben go prakseri boenboen èn brada nanga foeroe ondrofeni ben si winimarki foe en. Baka wan pisten joe sa man foe gi toemsi moi piki tapoe difrenti gens-taki.
GOBAKA NANGA BIJBELSTUDIE
5 Na a fosi fisiti foe joe kande joe kan kon sabi dati na ososma abi spesroetoe belangstelling gi wan bepaalde tori. Soekoe na a ten di joe e sreka joesrefi gi na gobaka na tori na ini na index foe na Tak-go-tak-kon-boekoe. Efoe a tori de ini a boekoe, dan a kan de dati joe feni wan rai di e sorgoe foe wan boen direkt fasi ma tog ini wan balans fasi foe taki nanga a sma, ofoe joe e kisi moro bodoi foe bijbel di a sma di joe taki nanga en kan njan boen foe dati.
6 Efoe tapoe wan bijbelstudie wan aksi kon a fesi èn joe e teki a bosroiti dati a moro betre foe piki na aksi dati bifo joe gwe, loekoe dan a bakasé ini na index foe na Tak-go-tak-kon-boekoe ofoe ini na lijst foe den moro prenspari tori na fes’sé. Wan sma ben kan ferteri foe eksempre na sma di abi belangstelling dati Jehovah Kotoigi de wan sekte. Tapoe bladzijde 219 den bodoi tanapoe di joe abi fanowdoe. Den de makriki foe feni foe di joe e soekoe na ondro den „Prenspari tori” a tori „Jehovah Kotoigi”. Den spesroetoe bodoi joe kan feni srefi moro esi te joe naki na index opo pe tanapoe „Den sekte”. Lési koroestoe na piki precies leki fa a tanapoe na ini a boekoe èn taki moro fara foe en nanga a bijbelstudenti. No broko joe ede foe en dati na studenti e si dati tapoe a fasi disi joe e kisi ekstra bodoi.
7 Wan sisa ben ferteri foe a tangi foe en foe na Tak-go-tak-kon-boekoe èn ben skrifi: „Na tactvol fasi foe taki sondro frede foe difrenti moeilek tori, de wan troetroe blesi gi wi.” Efoe wi kon sabi na toemsi moi wrokosani disi èn e gebroiki en na ini a veld, dan wi sa man foe doro na ati foe sma na ini wi gebied moro boen.