Meki wan boen gebroiki foe Tak go tak kon nanga jepi foe den boekoe
1 „Oenoe ben sa feni en boen foe kan tak go tak kon moro betre nanga jepi foe den Boekoe? Te oenoe de na ini na dienst dan den e aksi oen aksi tapoe san oenoe kan gi moeilek wan boen piki? Oenoe ben sa feni en boen foe kisi jepi na ini disi foe oenoe kan jepi sma di abi wan reti-fasi foe prakseri ini oenoe gebied foe kon ferstan na waarheid?” Efoe joe ben piki den aksi disi di na takiman ben poti gi oenoe tapoe na „Sma di e kibri den soifri-reti-fasi”-congres nanga ija, wi de seker taki joe ben de prisiri foe jere na barwroko dati na Genootschap ben meki wan njoen anoeboekoe foe na velddienst, Tak go tak kon nanga jepi foe den Boekoe. Sensi di a ben komoto a doro joe ben gebroiki na heri boen wrokosani disi krinkrin foe ’tak go tak kon’ foe nasani san joe e leri sma nanga jepi foe den Boekoe, ’foe ferklari èn bewijsi den’? — Tori. 17:2, 3.
O TEN FOE GEBROIKI NA TAK GO TAK KON-BOEKOE
2 Te wi e sreka a fesi tapoe wi oso foe oso diniwroko dan a fiti foe troe foe loekoe wantoe foe den heri moi inleiding ini a bigin foe a boekoe. Joe kan gebroiki wan foe den noso fiti den na den omstandigheden ini na kontren pe joe e wroko? Sondro degedege joe sa kisi jepi foe feni wan heri boen fasi foe bigin taki nanga sma te joe e loekoe wantoe foe den bodoi. Ooktoe te joe e doe na troetroe oso foe oso wroko joe kan kon ferstan taki joe inleiding no e wiki na belangstelling. Foe san-ede te joe e waka foe na wan oso go na a tra wan joe no e teki na Tak go tak kon-boekoe foe kisi wantoe prakseri? Noso kande wantoe ososma ben poeroe na taki na den nanga na srefi genstaki. Te joe gebroiki na pisi foe bigin foe bladzijde 15, joe kan kisi jepi foe kenki wan problema di sori taki joe no kan wini en ini wan opo doro foe takmakandra di e go doro.
3 Te joe e tjari wan go baka noso e lei wan bijbelstudie, kande joe e si taki wan (. . .) abi problema foe ferstan wan punt noso foe si en ini na joisti leti. A kande taki a abi aksi ete. Na Tak go tak kon-boekoe abi hondrohondro spesroetoe aksi nanga foeroe agersitori ofoe bodoi di kan jepi joe foe doro na ati foe na sma di e poti den aksi. Loekoe foe wan eksempre pikinso na na agersitori tapoe bladzijde 181 na ini san den e sori foe san-ede Jehovah ben gi goddelowsfasi pasi foe de.
4 Na Tak go tak kon-boekoe kan jepi joe toe foe tjari kon a krin sortoe kenki wan bijbelstudenti kan tjari kon na ini en libi foe plisi Jehovah. A kan de taki leki wan eksempre, toe sma e libi makandra leki patna ini wan oso sondro foe den trow na wet. Bijbel argument foe na afersi disi skrifi tapoe bladzijde 203 èn 204. Ofoe wan bijbelstudenti kan abi problema foe kaba nanga na gwenti foe smoko tabaka noso gebroiki drugs. Ondro na takmakandra „Drugs” wi njoen anoeboekoe e taki foe foeroe troe tori na a sé foe den takroe gwenti disi èn a e sori tapoe tranga bijbel gron foe san-ede wan kristen moe wai pasi gi den.
5 Ini wi jeje feti di wi e feti na Tak go tak kon-boekoe kan jepi wi foe gebroiki „na feti-owroe foe na geest” na wan kraktifasi foe fri den sma di de na ini katibo foe Babylonis leri nanga fasi foe tak go tak kon di kibri dipi (Ef. 6:17; 2 Kor. 10:4, 5). Ma srefi a moro tranga fetisani no abi waarde efoe na sroedati no sabi fa foe wroko nanga en ofoe no abi en na en. Leki sroedati foe Kristus dan net soleki na ini a ten foe Mozes sma ben e doe, wi ’moesoe sreka wisrefi foe feti na fesi foe Jehovah’ (Num. 32:20, 21; 2 Tim. 2:3). Meki a de so taki wi alamala e meki boen gebroiki foe Tak go tak kon nanga jepi foe den Boekoe èn nanga dati alaten de klarklari foe verdedig èn meki a boen njoensoe kon na fesi.