Joe abi „wan maka na ini a skin”?
1 Wi abi wan troetroe angri foe doe a komando di wi kisi foe preiki a boen njoensoe so boen leki wi man. Ma foeroe foe wi lobi brada nanga sisa feni en moeilek foe abi wan dorodoro prati na ini a wroko disi, foe di serjoesoe siki noso mankeri na skin sei e hendri den foe doe dati, èn disi e meki taki a de wan moeilek sani gi den foe doe so foeroe leki den ben sa wani. Gi den, a kan de wan toemoesi moeilek sani foe kakafoetoe gi firi foe lasi-ati, spesroetoe te den e si taki trawan lontoe den de fajafaja na ini a diniwroko. — 1 Kor. 9:16.
2 Wan eksempre foe waka na baka: Na apostel Paulus ben moesoe feti nanga „wan maka na ini a skin”. A ben aksi Jehovah dri leisi tranga foe poeroe a problema di ben banawtoe en, èn a ben taki foe en leki „wan engel foe Satan” di ben tan naki en. Ma ala di a ben abi dati, tokoe Paulus ben horidoro èn a ben go na fesi na ini en diniwroko. A no ben firi sari gi ensrefi noso a no tron wan sma di ben kragi doronomo. A ben gi a moro boen sani di a ben abi. A sani di ben meki taki a ben man kakafoetoe nanga boen bakapisi, ben de a djaranti disi di a ben kisi foe Gado: „A no-froedini boen-atifasi foe mi nofo gi joe; bika a krakti foe mi e kon volmaakti na ini swakifasi.” A swakifasi foe Paulus ben tron wan krakti gi en, di a ben leri foe teki a situwâsi foe en leki fa a ben de, èn di a ben froetrow tapoe Jehovah èn tapoe santa jeje, so taki a ben kan horidoro. — 2 Kor. 12:7-10.
3 Fa joe kan horidoro: Libisma swakifasi e meki taki joe no man doe so foeroe na ini joe diniwroko gi Gado? Efoe dati de so, dan waka na baka a fasi fa Paulus ben si sani. Srefi efoe a siki foe joe noso a mankeri foe joe na skin sei no abi wan loesoe na ini a seti foe sani disi, tokoe joe kan poti ala joe froetrow tapoe Jehovah, foe di a e froestan san joe abi fanowdoe èn a sa gi joe „a krakti di e pasa san de normaal” (2 Kor. 4:7). Meki boen gebroiki foe a jepi di de foe kisi na ini a gemeente, èn no hori joesrefi aparti foe tra sma (Odo 18:1). Efoe joe feni en wan moeilek sani foe abi wan prati na a oso-foe-oso wroko, dan soekoe praktis fasi foe gi informeel kotoigi noso foe gi kotoigi nanga jepi foe telefon.
4 Ala di wan maka na ini a skin kan hendri joe na ini san joe man doe na ini a diniwroko, tokoe joe no moesoe firi leki joe no abi no wan prati na a diniwroko. Neleki Paulus, so srefi joe kan „gi kotoigi dorodoro foe a boen njoensoe foe a no-froedini boen-atifasi foe Gado”, ala di joe e doe san joe man doe nanga joe krakti èn san a situwâsi foe joe e gi pasi foe doe (Tori. 20:24). Ala di joe e doe ala moeiti foe klari joe diniwroko, sabi dan taki Jehovah e feni joe boen. — Hebr. 6:10.