Wi alamala de fanowdoe foe kaba a wroko
1 Ibri disipel foe Jesus Krestes moesoe froestan taki a meki di a e meki moeiti foe horibaka èn foe abi wan prati na a Kownoekondre-preikiwroko, de toemoesi prenspari. Jesus ben froestan taki den disipel foe en ben sa meki Kownoekondre froktoe ini difrenti nomroe (Mat. 13:23). Ala di den pionier di e wroko tranga e doe foeroe gi a preikiwroko, tokoe ala sma di e go doro nanga faja foe gi Gado glori foe di den e meki someni froktoe leki den man, moesoe kisi prèise. — Joh. 15:8.
2 Te wi e doe moeiti makandra, dan wi e doe foeroe: Jesus ben taki na fesi taki a moeiti foe ala den disipel foe en makandra, ben sa meki taki den e doe wroko di moro bigi leki di foe en (Joh. 14:12). Awansi den persoonlijk situwâsi foe wi e meki taki wi no man doe so foeroe noso taki wi no kan gi so foeroe ten na a Kownoekondre-preikiwroko, tokoe wi alamala de fanowdoe foe kaba a wroko. A de soifri leki fa Paulus ben taki: „A heri skin e meki a skin gro, foe di a de na ini wánfasi èn a meki na so wan fasi taki a e wroko makandra nanga jepi foe ibri skroefoe [foe a skin] di e gi san de fanowdoe, akroederi a fasi fa ibri memre man wroko na a joisti fasi.” — Ef. 4:16.
3 Son wan kan abi a firi taki den no doe foeroe. Ma na ini den ai foe Jehovah a prenspari sani na taki wi doe wi diniwroko nanga wi heri sili. Iniwan sani di wi e doe gi En, de warti èn a e warderi en. — Teki gersi Lukas 21:1-4.
4 Go doro foe horibaka gi a wroko: Wi alamala abi a grani foe gi materia sani foe jepi nanga a wroko na heri grontapoe. Son wan kan jepi so srefi nanga a wroko di e doe nanga skin, foe horibaka gi a Kownoekondrewroko. Ibri wan kan doe moeiti foe gi komentaar, di sreka boen na fesi, na den konmakandra èn foe abi wan prati na a theokrasia diniwroko-skoro. Te wi e gebroiki den okasi boen foe gi trawan deki-ati, dan wi e jepi a gemeente boen na jejefasi, èn disi e meki taki a man di a gemeente man doe a wroko di a kisi foe doe e kon moro bigi.
5 Foe troe, wi alamala de fanowdoe foe kaba a wroko. No wan sma moesoe abi a firi taki a no de fanowdoe foe kaba a wroko. A doe di wi alamala e doe moeiti makandra, awansi a bigi èn awansi a pikin, foe dini Jehovah e meki trawan kon sabi wi leki den wan-enkri troe anbegiman foe Gado (Mal. 3:18). Ibriwan foe wi kan abi wan prati di wani taki wan sani, foe gi grani na Jehovah èn foe e jepi trawan leri sabi en èn dini en.