Pionier e jepi trawan
1 Jesus ben taki: „A kotiwroko bigi troetroe, ma foeroe wrokoman no de. Begi a Masra foe a kotiwroko foe dati ede, foe a seni wrokoman go doe a kotiwroko foe en.” Foe di den fosi jarihondro kotiman no ben de foeroe ini nomroe èn a kontren di den ben moesoe wroko ben bigi, dan Jesus ben kan seni ibriwan foe den foe go wroko en wawan nanga a boen njoensoe foe miti someni sma leki a ben kan. Na presi foe dati, ’a ben seni den go toe na toe’ (Luk. 10:1, 2). Foe san ede toe na toe?
2 Den disipel dati ben njoen èn den no ben abi ondrofeni. Te den ben e wroko makandra dan den ben kan leri foe makandra èn gi makandra deki-ati. Soleki fa Salomo ben taki en: „Toe boen moro leki wán” (Preik. 4:9, 10). Srefi baka di santa jeje ben kanti na sma tapoe na a Pinksterfesa 33 G.T., Paulus, Barnabas, nanga trawan ben e go nanga kompe bribiman na ini a diniwroko (Tori. 15:35). A ben moesoe de wan grani srefisrefi gi son wan foe densrefi kisi leri foe den sortoe bekwaam man dati!
3 Wan heri moi leri programa: Neleki a fosi jarihondro prenki foe en, na so a disiten kresten organisâsi na wan organisâsi di e doe preikiwroko. A e gi wi leri toe. Ibriwan foe wi aparti moesoe abi a tranga lostoe ini wi ati foe pristeri a boen njoensoe so boen leki a kan. Foe kan meki moro preikiman kan go na fesi foe wroko so boen leki a kan, meki jepi de foe kisi.
4 Na a Kownoekondre diniwroko-skoro di den ben hori no so langa pasa, a Genootschap bariwroko foe wan programa gi pionier foe jepi tra sma ini a velddienst. A sani disi de fanowdoe? Ija, a de fanowdoe. Moro leki wan miljoen preikiman dopoe na ini den dri jari di pasa, èn foeroe foe den sma disi abi leri fanowdoe foe den kan doe a preikiwroko moro boen. Soema wi kan gebroiki foe poeroe wi na ini a nowtoe disi?
5 Foeroeten pionier kan jepi. Jehovah en organisâsi e gi den foeroe rai nanga leri. Pionier e kisi bodoi di fiti boen na san den abi fanowdoe ini den toe wiki di a Pionierskoro e hori. Den e kisi wini toe foe konmakandra nanga den kringopziener nanga distriktopziener, èn so srefi foe tiri di den owroeman e gi. Ala di a no ala pionier abi someni ondrofeni soleki Paulus nanga Barnabas ben abi, tokoe den kisi warti leri, èn den e prisiri foe kan prati a leri disi nanga trawan.
6 Soema sa kisi wini? A de so taki na soso njoen preikiman noso sma di dopoe njoenjoen wawan kan teki prati na ini a programa disi? Kwetikweti! Jongoewan nanga owroewan de di sabi waarheid foeroe jari kaba ma den ben sa warderi foe kisi jepi na ini spesroetoe kontren foe a diniwroko. Son wan e doe heri boen wroko na a sei foe libi poeblikâsi na baka ma den abi problema foe meki gobaka noso foe bigin bijbelstudie. Trawan kan bigin bijbelstudie koemakriki ma den e si taki den bijbelstudie foe den no e go na fesi. San e hori den studenti na baka? Pionier di abi ondrofeni kan kisi wan aksi foe jepi na tapoe den kontren disi. Son pionier de heri boen ini a kweki di den e kweki belangstelling, foe bigin bijbelstudie èn foe tjari njoen studenti kon na a organisâsi. Na ondrofeni foe den sa de wan jepi ini a njoen programa disi.
7 Joe feni taki a schema foe joe no e gi joe pasi foe horibaka gi den doronomo velddienst konmakandra so foeroe leki fa joe ben sa wani? Wan pionier ben sa man wroko nanga joe na wan ten te tra preikiman no ben sa man.
8 Boen wrokomakandra de fanowdoe: Toe tron wan jari, den owroeman sa seti sani gi preikiman di wani kisi persoonlek jepi foe abi wan prati na a „pionier e jepi trawan”-programa. Efoe joe e agri foe kisi so wan jepi, kon makandra nanga a pionier preikiman di kisi a wroko foe jepi joe, meki wan praktis velddienstschema èn hori joesrefi na en. Hori joesrefi na iniwan mofo di meki. Te oenoe e wroko makandra, loekoe foe feni fasi di abi boen bakapisi foe pristeri a boen njoensoe. Ondrosoekoe foe san ede son fasi foe bigin taki nanga sma e wroko boen. Poti prakseri tapoe den rai di a pionier preikiman kande sa gi joe foe kan meki a pristeri foe joe kon moro boen. Te joe e gebroiki den sani di joe ben leri, dan a go di joe e go na fesi na ini a diniwroko sa kon de krin foe si, gi joesrefi ma so srefi gi tra sma. (Loekoe 1 Timoteus 4:15.) Wroko makandra someni leki a kan, ala di joe e teki prati na ala den kontren foe a diniwroko, so srefi okasi preiki, ma poti prakseri tapoe iniwan spesroetoe kontren di joesrefi abi jepi fanowdoe.
9 A dienstopziener abi belangstelling gi a go di joe sa go na fesi. Ten na ten, a sa loekoe makandra nanga a gemeente boekoestudie leider fa joe e kisi wini foe a programa. A kringopziener sa wani jepi joe so srefi te a e fisiti a gemeente.
10 Jehovah wani taki en pipel moesoe kisi leri èn „de srekasreka . . . gi ibri boen wroko” (2 Tim. 3:17). Si a „pionier e jepi trawan”-programa leki wan heri boen seti foe jepi den wan di wani meki a bekwaamfasi foe den foe man preiki a wortoe kon moro boen. Efoe a de a grani di joe abi foe abi wan prati na ini a wroko disi, dan doe en nanga tangi, nanga sakafasi èn nanga prisiri.