„San mi moesoe doe?”
1 Joe di de wan jongoesma di de foe kon tron wan bigisma, ben sa kan aksi joesrefi: ’San mi moesoe doe nanga mi libi?’ Kresten jongoewan wani abi wan moro bigi prati na a diniwroko foe den gi Jehovah. Ma fa joe kan doe disi, ala di joe e kisi den frantiwortoe foe wan bigisma, di abi na ini toe a sorgoe di joe moesoe sorgoe joesrefi na materia sei? Kande a no de wan makriki sani foe feni a piki.
2 Son jongoewan e broko den ede te den e loekoe na ekonomia situwâsi foe grontapoe èn den sani di sma e taki sa pasa na ini a ten di e kon. Kande den e aksi densrefi: ’Mi moesoe teki moro grontapoe skoroleri? Mi moesoe go na ini a foeroeten diniwroko wantewante? Efoe wan sma wani teki a joisti bosroiti, dan a moesoe gi wan eerlijk piki na tapoe na aksi disi: ’San na a moro prenspari sani di mi wani na ini a libi?’ A sma moesoe ondrosoekoe foe san ede a wani doe wan sani.
3 San joe meki kon tron a moro prenspari sani na ini joe jongoe jari? Moro foeroe na soekoe joe e soekoe wini na materia sei, noso joe wani gebroiki joe libi troetroe foe meki Kownoekondre afersi go na fesi? Te joe abi joe akademia papira, dan dati no e gi joe a djaranti taki joe sa feni wan wroko. Foeroe jongoewan go doe wan tra sani. Den go leri spesroetoe wroko di wrokobasi abi fanowdoe nanga jepi foe programa di leri den wan vak, noso foe di den go na wan tèko skoro, noso den teki leri foe wan sjatoe pisi ten na wan heiskoro, di no e teki foeroe ten foe den èn pe den no moesoe doe foeroe.
4 Froetrow na tapoe a pramisi foe Jehovah: Wan prenspari sani foe hori na prakseri na a djaranti di Jehovah gi wi taki a sa sorgoe gi den wan di e poti Kownoekondre afersi na a fosi presi na ini den libi (Mat. 6:33). Disi a no wan pramisi di no abi waarde. Foeroe brada di e go na a Bedinariskoro ben meki den heiskoro papira bifo den leri a waarheid. Ma sortoe grontapoe wroko den ben doe? Wan toe nomo ben doe a wroko di den ben leri. Foeroe foe den ben doe wroko gi tra sma, èn na so fasi den ben sorgoe foe a moni di den abi fanowdoe, ala di den ben doe a pionierwroko. Foe di den ben abi wan moro bigi prati na ini a diniwroko, meki den e kisi blesi di warti moro iniwan sani na materia sei.
5 Efoe joe moesoe bosroiti san joe sa doe baka te joe kisi joe papira foe middelbaar skoro, dan loekoe ala den sani di abi foe doe nanga dati èn ondrosoekoe finifini foe san ede joe wani doe disi. Efoe joe wani foe teki den bosroiti foe joe na wan balansi fasi, dan loekoe a rai di de foe feni na ini na Ontwaakt! foe 8 maart 1998, bladzijde 19-21. Taki nanga joe papa nanga mama, den owroeman, joe kringopziener, èn den pionier na ini joe kontren di abi boen bakapisi. Dati sa jepi joe foe teki wan koni bosroiti foe san joe moesoe doe nanga joe libi.—Preik. 12:1, 13.