Meki boen gebroiki foe skoro
1 Disi na a ten na ini a jari pe foeroe jongoe sma e aksi densrefi: „Mi moesoe go kaba na skoro?” Ala di wan toe tjalensi nanga broko-ede kan abi foe doe nanga a go di jongoe sma moesoe go na skoro baka, tokoe foeroe winimarki de toe gi den jongoewan di e gi densrefi foe meki boen gebroiki foe a leri di den e kisi.
2 Wan boen fondamenti leri kan jepi wan sma foe gro na jejefasi. San wan sma e doe na ini en jongoe jari e bepaal foeroe san a kan doe leki wan bigisma. Srefi na ini tori di abi foe doe nanga skoro, wi kan taki dati „san wan sma e sai, na dati a sa koti toe” (Gal. 6:7). Jongoewan di e studeri den skoro lès fajafaja, kan kisi bekwaamfasi di sa meki taki Jehovah kan gebroiki den moro boen.
3 A de prenspari foe prakseri boen na fesi te wan sma wani teki den joisti skoro lès. Papa nanga mama moesoe jepi den pikin foe den foe teki den lès di kan gi a moro boen praktis leri, so taki den kan doro jeje marki na ini a libi. Te jongoewan e kweki den bekwaamfasi foe den, dan den sa abi a wini taki den sa man sorgoe densrefi na ini a pionierwroko. A fondamenti leri di den kisi moesoe jepi den foe prèise Jehovah awansi pe den e dini.
4 Jongoe sma, proeberi foe meki boen gebroiki foe den skoro jari foe joe. Ala di joe e doe dati, poti prakseri na tapoe wan libi di boen èn di e gi satisfaksi na ini santa diniwroko, na presi foe feti na baka posisi na ini grontapoe. Meki moeiti foe gebroiki joe libi foe doe a wani foe Jehovah. Na so wan fasi, joe sa abi boen bakapisi, foe prèise Jehovah.—Ps. 1:3.