Grontapu Skoroleri Nanga den Marki fu Yu na Yeye Fasi
1 Te yu kisi fondamenti skoroleri te yu yongu, dan dati kan gi yu den bekwaamfasi di yu abi fanowdu fu leisi èn skrifi bun èn fu sabi pikinso fu aardrijkskunde, historia, wiskunde, nanga sabidensi. Ala di yu e du dati, yu kan leri fa fu denki krin, ondrosuku tori finifini, lusu problema, èn kon nanga bun idea. Den sortu skoroleri disi sa abi bun wini gi yu na ini yu heri libi. Fa a grontapu skoroleri fu yu abi fu du nanga den marki fu yu na yeye fasi na ini a libi èn e yepi yu fu kisi ’praktisch koni èn a krakti fu man denki’?—Odo 3:21, 22.
2 Tron wan Sma Di Den Kan Gebroiki Bun na ini Gado Diniwroko: Te yu de na skoro, dan poti bun prakseri na den les èn du yu skorowroko di yu kisi fu du na oso bun. Efu yu man leisi bun èn abi a gwenti fu studeri, dan a sa moro makriki fu ondrosuku Gado Wortu èn hori yusrefi tranga na yeye sei (Tori 17:11). Te yu abi sabi fu difrenti sortu sani, dan dati kan yepi yu fu taki nanga sma di abi difrenti background, difrenti belangstelling, nanga difrenti bribi te yu miti den na ini a diniwroko. A leri di yu e kisi na skoro sa abi wini gi yu te yu e du den Kresten frantiwortu fu yu na ini Gado organisâsi.—Teki gersi 2 Timoteus 2:21; 4:11.
3 Leri fu Sorgu gi Yusrefi: Efu yu e du muiti, dan yu kan leri so srefi den bekwaamfasi di de fanowdu fu wroko moni na baka te yu klari skoro. (Teki gersi 1 Timoteus 5:8.) Luku bun sortu skorovak yu sa teki. Na presi fu poti yu prakseri na wroko di muilek fu feni, luku fu leri wan vak noso wan bekwaamfasi di sa yepi yu fu feni wan wroko di fiti na ala presi (Odo 22:29). Den sortu leri disi sa meki yu man sorgu gi yusrefi efu yu sa bosroiti fu go dini pe moro yepi de fanowdu.—Teki gersi Tori fu den Apostel 18:1-4.
4 Te yu e kisi fondamenti leri na skoro, dan dati kan yepi yu fu du moro na ini yu diniwroko. Wroko tranga fu kisi den bekwaamfasi di de fanowdu fu sorgu gi yusrefi ala di yu e go na fesi na ini a diniwroko fu Yehovah. Na so fasi a skoroleri di yu e kisi sa yepi yu fu doro den marki na yeye fasi di yu abi.