Aksi Boksu

◼ Sortu sani papa nanga mama musu luku bun nanga dati te den yongu pikin fu den e teki prati na a velddienst?

Na wan yoisti fasi Kresten papa nanga mama e tyari den pikin fu den go na ini a velddienst, èn den e gi den leri fu prati a Kownukondre bun nyunsu nanga trawan. Ala di den e du dati, toku a de fanowdu taki den e tan na ai èn e luku den yonguwan fu den bun, fu di kefar kan de na ini a gebied, srefi na ini den birti di sma e taki fu den dati „ogri no e pasa drape”. Fu di bigi-ai nanga doti seks e kon moro furu na ini den „muilek ten” disi di wi e libi na ini, dan moro nanga moro, sma e du ogri nanga tranga na pikin èn e meshandri den (2 Tim. 3:1-5). Papa nanga mama musu du den sani di de fanowdu fu kibri den yongu pikin fu den, fu den sma di wani du den ogri. San den kan du?

Na wan koni fasi Bijbel e gi rai taki wi musu de fersektiki èn luku na fesi fu si efu kefar de (Odo 22:3; Mat. 10:16). A marki dya no de fu meki wet, ma a de wan koni sani taki wan papa noso wan mama noso wan tra bigisma e go makandra nanga wan pikin te den abi wan prati na a velddienst. Efu tu yongu preikiman di yu kan frutrow e wroko makandra, dan a de wan bun sani taki papa nanga mama noso wan tra bigisma, e luku ala ten pe den de. A no de fu taki, dati ala di wan pikin e gro kon moro bigi èn e sori taki yu kan frutrow en, dan papa nanga mama kan bosroiti efu a de fanowdu taki den no e go so furu moro makandra nanga a pikin.​—Luku tu na Aksi Boksu fu Wi Kownukondre Dienst fu oktober 1992.

A de wan koni sani tu fu ala ten hori na prakseri taki sani musu de veilig te yu e rèis nanga oto noso te yu e waka fu a wan presi go na a trawan. Efu wi e du den sani di de fanowdu na fesi, dan disi e meki taki ongoloku no e pasa, èn den no e tyari den sari hebi fu pen, datra kostu, èn kande plekti na wet na ini grontapu lontu wi pe sma wani tyari sani go na fesi krutu moro nanga moro.

A e fiti taki yonguwan e „prèise a nen fu Yehovah” (Ps. 148:12, 13). Den wortu fu den di e plisi sma nanga a bun fasi fa den e tyari densrefi te den de na ini a diniwroko, e naki na ati fu sma èn e gi grani na Yehovah. ¡Papa nanga mama, awansi fa a no fa, yepi yu pikin fu abi wan prati doronomo na ini a meki di a bun nyunsu e meki bekènti, ala di yu de na ai fu kibri den gi den kefar di de!