San Yu Sa Taigi wan Budasma?

¹ Na ini son kondre moro leki afu fu den sma di e teki dopu abi a Buda bribi leki background. San e hari den sma disi kon na a waarheid? Fa yu kan fruteri wan Budasma a bun nyunsu?

² Sori Trutru Belangstelling: Furu fositen Budasma ben taki dati a no a dipi rideneri fu sani ben hari den kon na a waarheid. Na presi fu dati, a trutru persoonlijk belangstelling di sma ben sori gi den ben naki den ati. Wan uma fu Asia di e libi na ini Amerkankondre ben lobi a switifasi fu wan sisa di ben fisiti en so kefalek, taki a ben agri fu studeri Bijbel. A no ben man taki Ingrisitongo bun, ma a sisa ben abi pasensi. Te na uma ben weri noso a no ben man studeri, dan a sisa ben fisiti en nomo leki wan mati èn ben seti sani fu studeri wan tra leisi. Te fu kaba, na uma, den tu manpikin fu en, nanga en owru mama ben teki dopu. A ben drai go baka na a kondre pe a gebore èn ben yepi furu tra sma fu kon sabi a waarheid. Wan fu den manpikin fu en e dini now na a bijkantoro. ¡A e tyari blesi kon trutru te wi e sori Yehovah en ’bun-ati nanga lobi gi libisma’!​—Titus 3:4.

³ A Denki fu wan Budasma: Moro furu Budasma e frudrage san tra sma e denki, ma den no e feni en fanowdu fu hori densrefi na wan spesrutu leri. Fu dati ede den sani di ibriwan fu den e bribi e difrenti. Wan algemeen thema na ini wan fu den leri fu den Budasma na taki a libi lai nanga pina, ma nanga a kisi di wan sma e kisi sabi, a kan tapu a froisi di a sili e froisi ibritron baka kon na ini wan libi di no e gi satisfaksi. Sma e taki dati efu wan sma wani kon fri fu a froisi di a sili e froisi ibritron baka, dan wan sma musu doro Nirvana, wan situwâsi di sma no kan taki fa a de bika a no de wan presi noso wan sani di pasa, ma na presi fu dati, a de wan leigi sani pe pen nanga ogri no de. (Luku San e pasa nanga wi te wi dede?, bladzijde 9, 10.) San disi e leri wi? Taki a no ben sa yepi wi fu abi bun bakapisi te wi ben sa taki go taki kon fu a filosofia fu a Buda bribi. Na presi fu dati, taki fu aladei problema di de sani di e gi wi alamala broko-ede.

⁴ Poti Krakti na Tapu Sani Di Unu Ala Tu Abi Belangstelling Gi: Fu di moro furu den Budasma e si a libi na grontapu soso leki pina, meki na idea fu têgo libi na grontapu kan gersi wan law sani gi den. Toku, wi alamala abi na angri fu abi wan koloku osofamiri libi, fu si taki pina no de moro, èn fu sabi san a libi wani taki. Luku fa yu kan poti krakti na tapu sani di un ala tu abi fanowdu.

⁵ Yu ben kan pruberi na inleiding disi:

◼ „Na ini a ten disi wi e libi na ini wan grontapu pe furu sma e pina sondro taki den abi a fowtu fu dati. San yu denki taki de fanowdu fu tyari wan kaba kon na pina nanga sari gi ala sma? [Gi okasi fu piki.] Wan owruten pramisi de di e gi mi furu trowstu. [Leisi Openbaring 21:4.] A no de fu taki dati a ten dati no doro ete, ma te a doro, dan wi ben o wani si en, a no so?” Dan pristeri wan publikâsi di e taki fa pina sa kon na wan kaba.

⁶ Yu ben kan taigi wan moro owru sma:

◼ „Kande yu e broko yu ede neleki mi nanga den furu disiten takru denki èn a bakapisi di den abi na tapu den pikin fu wi. Fu san ede hurudu e kon moro nanga moro na mindri yongu sma? [Gi okasi fu piki.] ¿Yu ben sabi taki disi ben taki na fesi kaba na ini wan buku di ben bigin skrifi langa ten bifo den Moslim, Kresten, nanga den Hindu relisi ben bigin? [Leisi 2 Timoteus 3:1-3.] Luku taki den situwâsi disi tan de ala di sma e kisi moro nanga moro koni. [Leisi vers 7.] A publikâsi disi ben yepi mi fu frustan a waarheid di moro furu sma noiti no leri. ¿Yu ben sa wani leisi en?” Pristeri wan buku noso brochure di fiti a situwâsi fu a sma.

⁷ Moro furu den Budasma e lespeki Bijbel leki wan santa buku. Fu dati ede, leisi langalanga fu Bijbel (Hebr. 4:12). Efu a sma no lobi a krakti di den Westsei kulturu ben abi na tapu Bijbel, dan taigi en taki ala den skrifiman fu Bijbel ben de sma fu Asia.

⁸ Sortu Publikâsi Moro Bun fu Gebroiki? A traktaat Will Suffering Ever End? (¿Oiti wan Kaba Sa Kon na Pina?) ben tyari kon na doro spesrutu gi den Budasma, èn a druk na ini Singaleisi, Sneisi, Tai nanga Yapantongo. Boiti dati, furu preikiman gebroiki den publikâsi di e kon now nanga bun bakapisi: den buku De mens op zoek naar God (A Suku Di Libisma E Suku Gado), A sroto gi wan kolokoe osofamiri, nanga Wat jonge mensen vragen​—Praktische antwoorden (Yongu Sma E Aksi​—Piki Di E Wroko); den brochure „Zie! Ik maak alle dingen nieuw” („¡Luku! Mi E Meki Ala Sani Kon Nyun”), nanga Wat is het doel van het leven? Hoe kunt u het vinden? (San Na a Marki fu a Libi? Fa yu kan feni dati?), èn efu a de ete, Kownoekondre Njoensoe nr. 35, ¿Wan ten sa kon pe ala sma sa lobi makandra? Furu Budasma di e leri a waarheid now, e studeri a San Gado e aksi-brochure fosi, èn dan a Sabi-buku.

⁹ Ala di sma e taki dati den zendeling fu a Buda bribi ben doro na ini Ateine pikinmoro 400 yari bifo Paulus ben preiki drape, toku a no de seiker efu oiti Paulus ben miti wan sma di ben abi a denki fu a Buda bribi. Ma wi sabi fa Paulus ben denki fu preiki gi ala sortu sma. A ben meki ensrefi tron „srafu fu ala sma” so taki „toku [a] ben sa kan frulusu wan tu fu den” (1 Kor. 9:19-23). Wi kan du a srefi sani te wi e sori persoonlijk belangstelling gi sma èn te wi e poti krakti na tapu a howpu di wi alamala abi te wi e gi kotoigi na ibriwan sma di wi e miti.