¿Yu E Wroko Nanga wan Marki?
1 Yehovah na a Gado di abi marki fu san ede a e du sani (Yes. 55:10, 11). Wi e kisi a deki-ati fu de leki en (Ef. 5:1). Disi musu de seiker so na a fasi fa wi e du wi diniwroko. Fu dati ede na aksi e fiti: „¿Yu e wroko nanga wan marki?”
2 A preiki di yu e preiki oso fu oso, e gi okasi kotoigi, èn e prati publikâsi, na pisi fu a diniwroko di e du nanga wan marki. Ma hori na prakseri taki a wroko di wi kisi fu du a no soso fu preiki, ma so srefi fu meki disipel (Mat. 28:19, 20). Baka te wi sai den siri fu Kownukondre waarheid, dan wi musu go baka fu gi den watra èn sorgu den doronomo, ala di wi e fruwakti taki Yehovah sa meki sani gro (1 Kor. 3:6). Wi musu de seryusu fu tyari gobaka èn fu bigin bijbelstudie.
3 Du Moro na ini Yu Diniwroko: A e gi wan bun firi ala ten fu drai luku baka san yu ben du na ini a diniwroko èn taigi yusrefi: „Mi du san mi ben wani du.” Soleki fa a skrifi na 2 Timoteus 4:5, Paulus ben gi a deki-ati: „Du yu diniwroko dorodoro.” Dati wani taki dati yu musu du moro muiti fu go baka na ala den sma di abi belangstelling. Na ini yu alawiki diniwroko schema, poti wan fasti ten fu tyari gobaka. Wroko nanga a marki fu pruberi bigin bijbelstudie nanga den sma di wani regtfardikifasi. Disi musu de yu marki te yu e wroko na ini a diniwroko.
4 Aksi den preikiman fa den ben firi di den ben si taki den bijbelstudenti fu den ben dopu na wan bigi konmakandra. Den ben prisiri, kande a srefi leki den wan di ben dopu srefi. ¡Den ben doro wan bigi marki! Wan sma di e meki disipel ben taki en na a fasi disi: „Fu meki disipel wani taki dati moro prèiseman de gi Yehovah. A wani taki libi gi den sma di e teki a waarheid. Mi lobi leri tra sma waarheid—¡a moi kefalek! . . . Furu fu den sma di kon tron sma di lobi Yehovah, kon tron krosibei mati fu mi.”
5 ¡Prakseri fa yu e firi te yu man yepi wan sma fu tron wan futuboi di gi ensrefi abra na Yehovah! ¡Dati na wan bigi reide fu prisiri! Den sortu bakapisi disi e kon te wi e wroko na ini a diniwroko nanga wan marki.—Kol. 4:17.