¿Yu E Preiki a Kownukondre Doronomo?
1 Wi alamala ben prisiri di wi ben kon sabi taki Sranan ben doro wan heimarki di noiti ben doro ete fu 1978 preikiman na ini april 1999. ¡Disi e sori trutru a tranga muiti di ben meki leki wán man! Soleki buweisi e sori, dan na ini den mun di ben kon baka dati wan tu fu den preikiman disi ben abi problema fu preiki a Kownukondre doronomo, bika sensi a ten dati ibri mun ben abi so wan 1917 preikiman. Disi wani taki dati fu ibri 32 preikiman, wán no ben gi wan raportu di sori taki a teki prati na a velddienst ibri mun. Wi e denki taki a deki-ati di o gi now kan yepi fu lusu a problema.
2 Warderi a Grani: Wi musu abi furu warderi gi a grani di wi abi fu prati a bun nyunsu fu a Kownukondre nanga trawan. A wroko disi e meki Yehovah en ati prisiri èn e yepi opregti sma fu kon sabi a pasi fu libi (Odo 27:11; 1 Tim. 4:16). Te wi e gi kotoigi doronomo, dan wi sa kon abi moro ondrofeni na ini a diniwroko èn a sa meki wi kon abi prisiri fu di wi doro wan marki.
3 Meki wan Raportu fu a Wroko Di Yu Du: Son sma di e teki prati na a velddienst no e teki broko-ede fu meki wan wan raportu biten fu a wroko di den du. Noiti wi musu abi a firi taki a muiti di wi meki no bun nofo fu skrifi dati na tapu wi velddienstraportu. (Teki gersi Markus 12:41-44.) ¡Grantangi, skrifi san yu du! Te wi e gebroiki wan sistema na oso, soleki wan kalender, fu kan skrifi o langa wi ben de na ini a diniwroko, dan dati sa yepi fu memre wi ibri leisi baka taki na a kaba fu ibri mun wi musu meki wan raportu wantewante di e sori soifri san wi du.
4 Yepi Pe a De Fanowdu: Kande a de fanowdu taki sani di seti kaba na ini a gemeente sa musu seti moro bun, fu kan yepi den wan di abi yepi fanowdu fu abi wan prati na a diniwroko ibri leisi baka. A gemeente sekretarsi nanga den bukustudie leider musu seti en so taki preikiman di abi furu ondrofeni kan yepi den. Efu yu abi pikin-nengre noso tra bijbelstudenti di de preikiman di no dopu ete, dan leri den taki den musu gi a velddienstraportu fu den ibri mun.
5 Memre na ondrofenitori di ben nen, „Mi de nanga tangi gi wan langa libi na ini a diniwroko foe Jehovah”, na ini a Waktitoren fu 1 oktober 1997. Sisa Ottillie Mydland fu Noorwegen ben tron wan preikiman di ben e preiki a bun nyunsu doronomo bifo a ben dopu na ini 1921. Seibitenti na siksi yari baka dati, di a ben abi 99 yari, a ben taki: „Mi breiti taki mi kan de wan preikiman ete di e preiki ibri moen.” ¡Disi na trutru wan tumusi bun fasi fu denki di ala futuboi fu Yehovah kan teki leki eksempre!