Yu e gi wan preikiwroko raportu di soifri?
1 Furu Bijbel tori e taki fu a nomru fu wan sani. Fu di den nomru fu sani skrifi, meki wi man si den tori disi krin soleki fa den ben pasa. Fu gi wan tu eksempre, Gideon ben wini a kampu fu Midian nanga 300 man nomo (Krut. 7:7). Na engel fu Yehovah ben kiri 185.000 srudati fu Asiria (2 Kow. 19:35). Na a Pinksterfesa fu 33 G.T. sowan 3000 sma ben teki dopu, èn syatu baka dati a nomru fu sma di ben bribi ben gro kon tron wan sani fu 5000 sma (Tori. 2:41; 4:4). A de krin fu si na ini den tori disi, taki den fositen futuboi fu Gado ben meki furu muiti fu skrifi sani soifri.
2 Na ini a ten disi, na organisâsi fu Yehovah e gi wi a rai fu meki wan raportu ibri mun fu san wi ben du na ini a preikiwroko. A wroko di wi e wroko makandra na wan getrowfasi fu horibaka gi a seti disi, e meki taki wi man si sortu bun bakapisi a preikiwroko abi. Den raportu e tyari kon na krin sortu pisi fu a diniwroko musu kisi moro prakseri noso na sortu kontren na ini a diniwroko moro wrokoman de fanowdu. Nanga yepi fu den preikiwroko raportu den owruman kan si suma na den wan di kan du moro na ini a diniwroko èn sosrefi den wan di abi yepi fanowdu. A e gi a heri Kresten bradafasi deki-ati te den e si, nanga yepi fu den raportu, fa a kownukondre preikiwroko e go na fesi. Yu e du ala san yu man fu gi wan preikiwroko raportu di soifri?
3 A frantwortu di yusrefi abi: Yu e feni en muilek fu memre san yu ben du na ini a diniwroko na a kaba fu a mun? Efu dati de so, dan fu san ede yu no e skrifi san yu ben du ibri leisi te yu e go na ini a diniwroko? Son sma e gebroiki wan kalender noso wan buku pe den e skrifi sani ibri dei na ini. Trawan e tyari wan preikiwroko raportu nanga den, pe noti no skrifi na tapu. Gi yu preikiwroko raportu wantewante na yu Bukustudie opziener na a kaba fu a mun. Noso, efu yu wani, yu kan poti en na ini a boksu gi den preikiwroko raportu di de na ini a Kownukondre zaal. Efu yu frigiti fu gi yu raportu, dan meki kontakti wantewante nanga yu Bukustudie opziener na presi fu wakti te leki a kon na yu. Te yu e gi yu raportu biten, dan disi e sori taki yu abi lespeki gi a seti fu Yehovah, èn a e sori tu taki na wan lobi-ati fasi yu e hori den brada na prakseri di abi a wroko fu tyari den raportu kon na wan.—Luk. 16:10.
4 A frantwortu fu a Bukustudie opziener: Leki wan skapuman di de na ai, na so a Bukustudie opziener e poti prakseri na a diniwroko di den sma na ini a grupu du na ini a heri mun (Odo 27:23). A sabi efu iniwan preikiman abi wan bun prati doronomo na ini a diniwroko. A sa de gaw fu yepi den wan di no teki prati na ini a diniwroko wan heri mun langa. Furu tron a kan yepi den sma disi fu di a e gi den deki-ati noso rai. A kan yepi den sma disi tu te a o aksi den fu wroko makandra nanga en na ini a preikiwroko.
5 A Bukustudie opziener e sorgu taki ala sma na ini a grupu di abi a frantwortu fu gi den preikiwroko raportu, e du dati na a kaba fu a mun. Te den e du disi, dan a sekretarsi man gi wan soifri raportu fu a gemeente na a bijkantoro na tapu a di fu siksi dei fu ibri mun. Te a mun e kon na wan kaba, dan a sa de wan yepi gi a Bukustudie opziener fu memre den sma fu a grupu fu gi den raportu, èn a kan sorgu taki nofo preikiwroko raportu de na a Bukustudie adres. Efu wan tu sma e frigiti fu gi den raportu ala ten, dan a kan memre den wan disi na wan switi fasi fu hori dati na prakseri.
6 Te wi e gi wi preikiwroko raportu biten, dan na sowan fasi wan soifri raportu kan meki fu den sani di wi ben du na ini a preikiwroko. Yu sa gi yu preikiwroko raportu wantewante na a kaba fu ibri mun?