Fa yu kan kon sabi san tru?

Dusundusun yari langa, nowan sma ben sabi a sani disi. Dati meki son siki kiri milyunmilyun sma. Te fu kaba sabiman kon si fa siki e panya. Den kon si taki nofo tron virus nanga bakterie e meki sma siki. Fu di den kon sabi disi, meki sma ben man sorgu taki den no kon siki èn den ben man dresi furu fu den siki disi. Disi meki taki milyunmilyun sma man libi moro langa èn den kan de moro gosontu.

Fa a de nanga tra prenspari aksi fu a libi? Sortu wini yu o kisi te yu kon sabi a piki tapu den aksi disi?

• Suma na Gado?

• Suma na Yesus Krestes?

• San na a Kownukondre fu Gado?

• San o pasa na ini a ten di e kon?

Milyunmilyun sma kon sabi a piki tapu den aksi dati èn a yepi den fu kon abi wan moro bun libi. Den piki disi kan de wan yepi gi yu tu.

YU KAN KON SABI SAN TRU?

Ma kande yu e aksi yusrefi: ’Wi kan kon sabi san tru?’ Te yu e luku fa sani de now, dan a gersi leki a e kon moro muilek fu kon sabi san tru. Fu san ede?

Furu sma no e frutrow tiriman nanga bisnisman moro èn den no e bribi san telefisi noso nyunsu e sori, fu di den no e taki san tru. Sma feni en muilek fu kon sabi efu trawan e taigi den san tru noso efu den e taki nomo san den e denki fu wan tori. Son sma no e fruteri ala sani krin èn trawan e lei srefi. Fu di sma no e frutrow trawan moro èn fu di furu fu den sani di den e yere no tru, meki den no sabi moro san den musu bribi èn fa den musu frustan son sani.

Ma toku wi kan feni a yoisti piki tapu den moro prenspari aksi fu a libi. Fa? Na te wi e du den srefi sani di wi gwenti du fu kon sabi a piki tapu aksi di no prenspari so.

FA YU KAN KON SABI SAN TRU

Te yu luku en bun, dan ibri dei yu e suku fu kon sabi san tru. Luku san Jessica e du. A e taki: „A meisje fu mi no mag nyan pinda. Awinsi na wan pikin sani fu pinda a e nyan, a kan dede.” Dati meki Jessica musu de seiker taki a nyanyan di a e bai, no o tyari problema kon gi a meisje fu en. „Fosi mi bai wan nyanyan-sani mi e leisi bun san de na ini. Baka dati mi e ondrosuku sani moro fini. Mi e bel a bedrijf srefi di meki a sani, fu di a kan pasa son leisi taki toku wan sani fu pinda moksi nanga a nyanyan. Mi e luku tapu tra website tu fu kon sabi efu a bedrijf de fu frutrow.”

Kande a situwâsi fu yu no de so seryusu leki di fu Jessica. Ma fu kisi piki tapu den aksi fu yu, yu kan du a srefi leki en:

• Kon sabi ala san yu man fu a tori.

• Ondrosuku a tori moro fini.

• Luku efu den website noso tra presi pe yu e ondrosuku sani de fu frutrow.

Yu kan du den srefi sani disi te yu wani kisi piki tapu den prenspari aksi fu a libi. Fa so?

WAN PRENSPARI BUKU NANGA TRU TORI

Di Jessica ben wani kisi piki tapu den prenspari aksi fu a libi, dan a ondrosuku sani na a srefi fasi leki fa a e ondrosuku san a meisje fu en mag nyan. A e taki: „Mi teki ten fu leisi Bijbel èn fu ondrosuku sani moro fini. Na dati yepi mi fu si taki den sani na ini Bijbel tru.” Neleki Jessica, milyunmilyun sma kon sabi sortu piki Bijbel e gi tapu den aksi disi:

• Fu san ede wi de na grontapu?

• San e pasa te wan sma dede?

• Fu san ede sma e pina?

• San Gado e du fu sorgu taki nowan pina no de moro?

• Fa wi kan abi wan koloku osofamiri-libi?

Yu kan feni a yoisti piki tapu den aksi disi èn tapu tra aksi te yu e leisi Bijbel èn te yu e ondrosuku sani moro fini tapu a website www.pr418.com.