Yu E Horidoro?
1 „Mi abi no wan moro bigi reide fu de nanga tangi, leki den sani disi taki, . . . den pikin fu mi e tan waka na ini waarheid” (3 Yoh. 4). Yohanes ben kisi bigi prisiri fu di den pikin fu en na yeye fasi ben horidoro. Yehovah musu prisiri srefisrefi fu si taki milyunmilyun sma di o tron pikin fu en „e tan waka na ini a waarheid”!—Odo 23:15, 16; 27:11.
2 Ala di a pipel fu Gado e tan du Kresten diniwroko fayafaya, toku son wan fu den safrisafri no e du so furu moro. Ala di a kan de so taki den sma disi wroko fayafaya di den bigin sabi a waarheid, toku baka furu yari, dan den kon kisi a gwenti fu teki prati son ten nomo na a wroko fu meki disipel.
3 Wi kan frustan taki son wan fu den e du en safrisafri, fu di den e siki kande noso fu di den abi tra problema na skin sei èn fu di den e kon owru. Ma toku wi musu prèise den fu di den e horidoro. Den e du san den man du. Ma ibri sma di gi ensrefi abra na Gado musu aksi ensrefi: ’Mi e poti so furu prakseri na den sani di mi wani gi misrefi, taki Kownukondre afersi no de so prenspari moro ini mi libi? Mi tron wan sma di „broko-kowru”, noso mi e du „bun tranga” muiti ete?’ (Openb. 3:15, 16; Luk. 13:24) Meki wi alamala luku na wan opregti fasi san wi e du, èn meki wi go na fesi pe a de fanowdu ala di wi e tan hori na prakseri taki Yehovah e pramisi fu gi „glori nanga grani nanga vrede gi ibriwan sma di e du san bun”.—Rom. 2:10.
4 Fa fu Horidoro: San ben yepi Yesus fu horidoro? Paulus ben fruklari: „Fu a prisiri ede di ben poti na en fesi, meki a ben horidoro na wan pina-udu, a ben wisiwasi syen, èn a go sidon na a reti-anu fu a kownusturu fu Gado” (Hebr. 12:1-3). A prisiri di ben poti na Yesus en fesi, ben bigi furutron moro leki den tesi di a ben abi fu kakafutu gi fu wan syatu pisi ten. Te wi e tan hori na prakseri a prisiri di poti na wi fesi, dan dati sa yepi wi fu horidoro tu (Openb. 21:4, 7; 22:12). Te wi e howpu tapu Yehovah fu gi wi krakti nanga yepi fu a studeri di wi e studeri nanga wisrefi, nanga yepi fu den konmakandra te wi e go na den doronomo, èn nanga yepi fu a begi di wi e begi doronomo, dan dati sa meki taki wi sa man horidoro ini a wroko di A ben gi wi fu du.
5 Yehovah e prisiri fu di den getrow wan fu en e horidoro. So bun, meki wi gi En moro prisiri fu di wi „e tan waka na ini waarheid” doronomo.