Tan poti a Kownukondre na a fosi presi
1 Te wi abi broko-ede na moni sei noso tra problema, dan a no makriki fu tan poti Gado Kownukondre na a fosi presi. Fa wi kan tan poti Gado Kownukondre na a fosi presi te problema opo ede kon? San wi musu du efu wan sma wani gi wi wan wroko di sa meki taki wi sa misi den konmakandra noso taki wi no man du a preikiwroko na wan bun fasi? A Kownukondre o tan a moro prenspari sani na ini wi libi?
2 Wan tranga bribi de fanowdu: Te den sortu situwâsi disi na wan tesi gi a bribi fu wi, dan wi no musu frigiti a pramisi fu Yehovah. Wi no musu frigiti tu taki Yesus gi wi a dyaranti taki Gado o horibaka gi wi te wi e suku a Kownukondre fosi (Ps. 37:25; Mat. 6:31-34). Grontapu denki nanga den problema di grontapu e tyari kon kan meki taki wi no man si sani so krin moro èn taki wi no man tan poti a Kownukondre na a moro prenspari presi. Son brada noso sisa meki taki wan hei posisi na wrokope noso wan wroko pe den man wroko moro moni, kon tron a moro prenspari sani na ini a libi. Ma leki Paulus, wi musu ondrosuku soifri san prenspari trutru na ini a libi.—Fil. 3:7, 8.
3 Wi musu seti sani tra fasi?: Wan preikiman ben taki: „A moro prenspari sani gi mi ben de mi bisnis. Mi ben lobi dati srefisrefi. Mi ben e denki taki mi ben kan tan de wan Kotoigi, awinsi mi e gebroiki mi ten moro furu fu seti bisnis tori.” Ma en konsensi ben tan naki en taki a ben kan du moro gi Yehovah. Baka wan pisi ten a libi a heri bisnis fu en. A bisnis ben de wan sani di ben e tapu en fu go na fesi na yeye fasi. Di a ben gi ala en ten fu du a Kownukondre wroko, a ben man taki: „Now mi e firi taki Yehovah e feni a fasi fa mi e libi bun èn dati na a moro prenspari sani.”
4 A moi fu si taki furu brada nanga sisa libi den wroko nanga okasi di den ben abi fu wroko moro moni. Den sorgu taki den ben abi soso san den ben abi fanowdu trutru, èn ben man go du a furuten diniwroko. Yongu dinari ini a diniwroko nanga owruman di no trow, di go na a Dinariskoro ben du disi èn den kisi moi grani fu du diniwroko. Den e teki a moi eksempre fu Paulus, èn den de tevrede nanga den prenspari sani na ini a libi.—1 Kor. 11:1; 1 Tim. 6:6-8; Hebr. 13:5.
5 Kande grontapu e wisiwasi a fasi fa wi e denki fu a libi, ma wi abi a blesi fu Yehovah (1 Kor. 1:26-31). A no e gi wi deki-ati te wi sabi taki Gado o gebroiki wi someni leki wi kan èn taki a o yepi wi fu du a wroko fu en? Na okasi di wi abi nownow fu meki a seti fu Gado Kownukondre bekènti no sa kon baka noiti. Sobun, now na a ten fu tan poti a Kownukondre na a fosi presi na ini wi libi.