Wi e prisiri fu wroko makandra nanga Yehovah èn en Manpikin
Tapu 28 maart wi sa hori a moro prenspari fesa fu a yari
1 Baka te son dongo tapu 28 maart 2002, dan wi o hori na Avondmaal fu Masra. Te wi e du dati, dan wi o sori taki wi e prisiri fu wroko makandra nanga Yehovah Gado èn sosrefi nanga Yesus Krestes. Na a tumusi prenspari okasi dati, a fikapisi fu salfu Kresten sa nyan bun fu a spesrutu „demakandra” di den abi nanga den tra Kownukondre erfgenaam, nanga a Tata, èn nanga a Manpikin (1 Yoh. 1:3; Ef. 1:11, 12). Milyunmilyun sma fu den „tra skapu”, e firi èn e denki neleki Yehovah èn neleki en Manpikin. Na a ten fu a Memrefesa den sa prakseri dipi fu a bigi grani di den abi fu wroko makandra nanga Yehovah èn nanga en Manpikin, fu klari a wroko fu Gado!—Yoh. 10:16.
2 Wroko makandra leki bun mati: Yehovah nanga Yesus wroko makandra nanga prisiri, na ini ala sani. Milyunmilyun yari bifo libisma ben meki, den ben abi bun demakandra kaba (Mika 5:2). Na a fasi disi den tron bun mati èn den kisi dipi firi fu lobi gi makandra. Bijbel e taki fu koni neleki a e taki fu wan sma, te a e taki fu a libi fu a fosi gebore Manpikin fu Gado na hemel bifo a ben tron wan libisma. A fosi gebore Manpikin disi ben kan taki fu dati ede: „Mi ben tron a sma di a ben lobi trutru ibri dei, èn mi ben breiti na en fesi ala ten” (Odo 8:30). Bun langa ten a volmaakti Manpikin fu Gado wroko krosibei makandra nanga a Sma pe lobi e komoto. A demakandra dati, ben abi bigi krakti tapu a Manpikin fu Gado!—1 Yoh. 4:8.
3 Yehovah ben wani frulusu a libisma famiri. Fu dati ede, a ben teki en wan-enkri gebore Manpikin, di ben lobi libisma trutru, fu gi en libi leki wan lusu paiman gi wi. A lusu paiman disi na a wan-enkri howpu gi libisma (Odo 8:31). Yehovah nanga en manpikin e wroko makandra fu du ala san Yehovah abi na prakseri, èn wisrefi musu wroko makandra nanga den èn nanga trawan. Wi e tan wroko makandra, fu di wi abi wan tranga banti fu lobi, aladi wi e du a wani fu Gado nanga prisiri.
4 Wi musu sori bigi warderi: Efu wi wani sori taki wi abi trutru warderi gi a lobi fu Yehovah èn gi a srakti-ofrandi di en Manpikin tyari gi wi, dan wi o de na a Memrefesa èn wi sa arki nanga ala wi prakseri èn nanga lespeki. Na a Memrefesa den sa poti krakti tapu a lobi-ati eksempre di Yesus gi wi, a fasi fa a ben gi en libi leki wan lusu paiman fu di a ben tan getrow teleki a dede. Den sa poti krakti sosrefi tapu a tiri di a e tiri nownow kaba leki Kownu fu a Kownukondre fu Gado èn tapu den blesi di a Kownukondre sa tyari kon gi a libisma famiri. Den sa memre wi tu o prenspari a de fu tan sori bribi doronomo, fu di nanga faya wi e tan wroko akruderi a wani fu Yehovah, leki „sma di e wroko makandra na ini waarheid”.—3 Yoh. 8; Yak. 2:17.
5 Yepi trawan fu wroko makandra nanga wi: A skin fu owruman musu meki ala muiti fu gi deki-ati na den wan di no e preiki moro, fu kon na a Memrefesa fu a dede fu Krestes (Mat. 18:12, 13). Skrifi na tapu papira suma na den wan di musu kisi deki-ati. Na so fasi, unu sa man fu gi wan kari na ibriwan fu den, so taki unu no misi nowan sma.
6 Yu sabi sma di wani kon na a Memrefesa? Meki muiti fu yepi den fu kisi moro warderi gi a prenspari okasi disi. Kari den na wan switi fasi fu kon na a Memrefesa èn meki den firi taki yu breiti fu si den drape. Meki wi du ala san wi man fu kari ala den bijbelstudenti fu wi èn tra sma di wani sabi moro fu Bijbel, fu kon na a tumusi prenspari okasi disi. Kari sosrefi yu famiriman nanga tra sma di yu sabi. Te now ete a de so, taki iniwan sma di wani fu kon kisi a ’tumusi moi sabi fu Krestes Yesus’ kan nyan bun fu den winimarki fu a lusu paiman (Fil. 3:8). Den sma di e bribi na ini a srakti-ofrandi fu Krestes, kan abi a tranga howpu fu kisi têgo libi.—Yoh. 3:16.
7 Prakseri taki a Memrefesa kan abi furu krakti tapu opregti sma. Tu yari pasa, 11 sma fu na èilanti Papuwa Nyun Ginea, ben teki waka sowan 17 yuru langa. Den sma disi no ben de Kotoigi ete. Den ben abra wan se nanga wan pikin boto na ini krasi watra, soso fu man de na a Memrefesa. Fu san ede? Den ben taki: „Wi ben wani fu de na a Memrefesa fu a dede fu Krestes, makandra nanga tra anbegiman fu Yehovah. Sobun, a muiti di wi meki fu kon dyaso no ben de fu soso.” Prakseri a faya di den sma disi ben sori èn prakseri o furu warderi den ben abi gi a grani fu wroko makandra na wan prisiri fasi nanga Yehovah, en Manpikin, èn sosrefi nanga ala Kresten brada nanga sisa!
8 Pristeri wan bijbelstudie na ala sma di wani sabi moro. Gi den deki-ati fu de na ala den gemeente konmakandra, èn fu fruteri trawan den Bijbel waarheid di den e leri. Yepi den fu fiti Bijbel gronprakseri na ini a libi fu den, so taki den kan ’waka na ini leti’ èn ’du soleki fa a waarheid e taki’ (1 Yoh. 1:6, 7). Yepi den fu tron bun mati fu Yehovah èn fu tan kisi moro warderi gi a grani di den abi fu du a wani fu En, makandra nanga tra sma.
9 Fu tru a de wan bigi grani fu wroko makandra nanga prisiri èn ’na ini wán yeye, nanga wán sili, aladi wi e feti sei na sei gi a bribi fu a bun nyunsu’! (Fil. 1:27, 28) Tapu 28 maart wi sa hori wi Memrefesa. We, meki wi angri fu abi prisiri demakandra tapu a dei dati, èn meki wi de nanga bigi tangi na ati fu san Yehovah nanga en Manpikin du gi wi!—Luk. 22:19.