Yu kan yepi?
1 Ala leisi Yehovah e luku na sortu fasi a kan yepi den loyaal futuboi fu en (2 Kron. 16:9; Yes. 41:10, 13). Di Yesaya ben agersi Yehovah nanga wan lobi-ati skapuman, a ben skrifi: „Nanga en anu a sa tyari den pikin skapu kon na wan, èn na en borsu a sa tyari den. Den wan di de na bobi, a sa tiri nanga koni” (Yes. 40:11). Luku wan tu fasi fa wi kan sori neleki Yehovah taki wi lobi sma èn taki wi e broko wi ede nanga den.
2 Yepi den nyunwan: Wi kan de wan yepi te wi e gi den nyunwan wan kari fu abi bun demakandra nanga wi (Odo 13:20). Wan brada e memre fa trawan ben yepi en di a bigin abi demakandra nanga a gemeente, èn a e taki: „Wan tu leisi, wan famiri ben kari mi fu kon na a osofamiri studie fu den. Di mi ben e go na fesi, dan wan yongu pionier trowpaar ben e gi mi kari furu tron fu go heri dei na ini a preikiwroko nanga den. Ala ten wi ben abi moi takimakandra fu yeye afersi.” A e taki moro fara: „Fosi mi tron wan Kresten, mi ben gwenti fu go koiri tapu freida nanga satra neti fu abi demakandra nanga tra sma. Ma now mi no abi fu du dati moro, fu di mi e kon makandra nanga den brada nanga sisa.” Fu di den sma na ini a gemeente ben e broko den ede na so wan lobi-ati fasi nanga a brada disi, meki dati yepi en fu kon abi wan tranga bribi. Now a brada disi na wan memre fu a Bethelfamiri.—Kol. 2:6, 7.
3 Gi makandra deki-ati: Kande wi e si wan okasi fu yepi wi brada nanga sisa te den de na ini wan muilek situwâsi. Yu kan seti sani fu gi kotoigi nanga yepi fu telefon makandra nanga wan preikiman di siki? Yu kan aksi en fu go nanga yu na wan bijbelstudie, noso yu kan tyari a studenti go srefi na a oso fu a preikiman di siki? A kan de so taki wan papa noso mama abi yepi fanowdu nanga den yongu pikin fu en te den de na ini a preikiwroko? Den sma di e syensyen sa breiti nanga a yepi di yu kan gi den te den musu tyari wan gobaka, noso te den musu du wan tra sani di abi fu du nanga a preikiwroko? Fu di wi lobi wi brada nanga sisa èn wi e broko wi ede nanga den, meki wi sa suku fasi fu gi den deki-ati.—Rom. 14:19.
4 Te wi e teki na eksempre fu Yehovah di lobi den futuboi fu en èn di e broko en ede nanga den, dan na so fasi wi sa tranga makandra, wi sa yepi den wan na ini a gemeente fu lobi makandra, èn wi sa gi glori na wi hemel Tata.—Ef. 4:16.