Gebroiki yu ten bun na ini a preikiwroko
1 A no de fu taki dati wi musu du furu na ini wi diniwroko, èn a ten di tan abra kon syatu (Yoh 4:35; 1 Kor. 7:29). Te wi e orga wi diniwroko bun èn te wi e sreka sani na fesi, dan wi sa gebroiki a ten bun di wi poti na wan sei fu du wi diniwroko.
2 De srekasreka: Bifo wi e go na a preikiwroko konmakandra, dan wi musu luku taki wi abi den publikâsi di wi sa abi fanowdu èn wi musu sabi bun san wi sa taki. Te a konmakandra kaba nanga begi, dan wi musu go wantewante na ini a preikiwroko. Disi sa yepi yu nanga den sma di e wroko nanga yu, fu du so furu leki unu man na ini a ten di unu abi fu go na ini a preikiwroko.
3 Efu yu kisi a frantwortu fu hori a preikiwroko konmakandra, dan sorgu taki yu e bigin biten. Hori a konmakandra syatu èn no hori en moro langa leki 10 te go miti 15 miniti. Fosi a grupu go na ini a preikiwroko, luku taki ibri sma sabi pe a e wroko èn nanga suma a e wroko.
4 Te yu de na ini a preikiwroko: Te a preikiwroko konmakandra kaba, dan no draidrai efu a no de fanowdu, ma pruberi fu go wantewante na a kontren pe yu o wroko. Te yu e wroko makandra nanga wan grupu, dan hori den tra sma na prakseri di e wakti yu fu kaba nanga wan takimakandra. Kande yu o abi fu tapu a takimakandra na wan koni fasi te na ososma e haritaki nanga yu, noso kande yu abi fu meki wan mofo fu go baka na wan sma di wani sabi moro.—Mat. 10:11.
5 Te yu e tyari gobaka, dan a ben o bun fu du ala den gobaka fu a wan kontren, fosi yu go na wan tra kontren. Na so fasi, yu no sa abi fu rèi noso waka fara fu soso. A ben o bun fu bel den gobaka, fu sabi efu den o de na oso (Odo 21:5). Efu yu denki taki yu sa tan langa na wan spesrutu gobaka, dan sani kan seti na fesi gi den tra sma na ini a grupu fu yu, fu go preiki na wan kontren di de krosibei noso fu go na wan tra gobaka.
6 Wi e libi na ini a pisi ten pe a kotiwroko na yeye fasi bigi (Mat. 9:37, 38). Heri esi a wroko sa kon na wan kaba. Fu dati ede, wi musu angri fu gebroiki wi ten bun na ini a preikiwroko.