Wi e sori taki wi abi wan tranga bribi!
1. Sortu sani ben o pasa na grontapu, soleki fa Yesus ben taki na fesi?
1 Den apostel ben arki bun di Yesus ben taki fu a denoya fu en èn fu a kaba fu a grontapu sistema. Sani ben o pasa na grontapu di ben o gi libisma furu broko-ede, soleki orloku, angriten, gronseki, nanga siki di e kiri ipi-ipi sma. Baka dati, Yesus taki dati sma ben o teige den bakaman fu en, sma ben o tyari banawtu kon na den tapu, èn den ben o kiri den. Falsi profeiti ben o opo kon èn den ben o kori furu sma. A lobi fu furu sma ben o kon kowru.
2. Fu san ede a de wan tumusi aparti sani taki a bun nyunsu e preiki na heri grontapu?
2 Baka di den apostel yere sortu ogri sani ben o pasa, dan den ben musu fruwondru di Yesus taigi den taki a bun nyunsu fu Gado Kownukondre ben o preiki gi sma na heri grontapu (Mat. 24:3-14). Na ini a ten disi wi e si fa a span profeititori dati e kon tru na wan tumusi aparti fasi. Aladi wi e libi na ini muilek ten, toku Yehovah Kotoigi e preiki a bun nyunsu fayafaya. A lobi fu a grontapu disi e kon kowru, ma a lobi fu wi e kon tranga moro nanga moro. Aladi sma fu „ala kondre” e teige wi, toku wi e preiki na ini pikinmoro ibri kondre.
3. Sortu sani yu feni moi na ini a raportu fu heri grontapu?
3 A e gi wi deki-ati te wi e luku a wroko di Yehovah Kotoigi du na ini a dienstyari di pasa, soleki fa dati skrifi na ini a raportu fu heri grontapu na tapu bladzijde 3 te go miti 6. Now na a di fu 16 yari kaba taki wi preiki moro leki wán milyard yuru na ini a preikiwroko èn na ini a wroko fu meki disipel. Disi e sori taki a bribi fu Yehovah Kotoigi tranga trutru! Te wi e teki a dienstyari 2006 gersi nanga a dienstyari 2007, dan wi e si taki wi kisi 5,8 procent moro pionier, wi kisi 3,1 procent moro preikiman, èn wi ben hori 4,4 procent moro bijbelstudie. A nomru fu sma di teki dopu ben de 20,1 procent moro leki na ini a dienstyari 2006. A de wan prisiri sani fu si taki pikinmoro seibi milyun sma e dini Yehovah getrow. Noiti ete na ini a libisma historia so furu sma e dini Yehovah! Te yu luku a raportu fu heri grontapu, dan sortu spesrutu sani e gi yu deki-ati?
4. Nanga sortu takru gwenti wan man ben musu tapu, so taki a ben man teki dopu?
4 Aladi den nomru na ini a raportu hei, toku wi no musu frigiti taki den nomru disi abi fu du nanga sma di sori taki den abi bribi. Luku wan eksempre. Guillermo kweki na ini Bolifia. A gebore na ini 1935, èn di a ben abi neigi yari a bigin wroko na wan pranasi pe sma ben prani coca. Sensi di a ben pikin, a ben kaw den coca wiwiri fu firi frulekti fu a tranga wroko di a ben du. Bakaten a ben dringi sopi pasa marki èn a ben smoko sikaret. Di Guillermo bigin leri sabi san Yehovah wani taki a du, dan a ben tapu nanga smoko èn a no ben dringi sopi pasa marki moro. A moro bigi tesi di a ben abi na fu tapu fu kaw coca wiwiri, wan sani di a ben du en heri libi kaba. A ben begi doronomo èn te fu kaba a tapu nanga a gwenti disi. Baka di a tapu nanga den takru gwenti fu en, a teki dopu. Guillermo e taki: „Now mi e firi bun fu di mi no e doti mi skin moro, èn mi e firi koloku trutru.”
5. San yu wani taki sma musu kisi?
5 Yehovah e broko en ede trutru nanga sma. A wani taki ala sma musu kisi berow (2 Petr. 3:9). Wi wani tu taki sma kisi berow. Meki wi du ala san wi man fu tan yepi opregtisma fu kon sabi Yehovah, èn fu kon lobi en neleki fa wi e du dati.