Fa fu gebroiki a buku Blijf in Gods liefde fu hori Bijbelstudie
1. Fu san ede a buku Blijf in Gods liefde meki?
1 Wi ben breiti srefisrefi fu kisi a nyun buku Blijf in Gods liefde na a „Santa yeye fu Gado e tiri wi” Distrikt Kongres. Soleki fa a ben meki bekènti, dan a buku disi meki spesrutu fu yepi wi fu kon sabi èn lobi den gronprakseri fu Yehovah di e sori wi fa wi musu tyari wisrefi. A buku disi a no fu leri sma den moro prenspari Bijbel leri. Wi no sa prati a buku disi oso fu oso.
2. Fa wi o gebroiki a buku disi, èn nanga suma wi o studeri en?
2 A buku disi sa de a di fu tu buku di wi o studeri nanga den Bijbelstudenti di kaba a Bijbel leri-buku. Hori na prakseri taki a no ala sma de a srefi te den musu leri èn du san skrifi na ini Bijbel. Wi no musu studeri esi-esi nanga sma, ma wi musu luku o furu a sma man du. Wi musu sorgu taki a studenti e frustan bun san a e leri. Nofo tron, a no o de fanowdu fu gebroiki a buku disi fu bigin Bijbelstudie nanga sma di studeri wan tu buku kaba na ini a ten di pasa, ma di no e kon na den gemeente konmakandra èn di e sori taki den no wani libi soleki fa den leri na ini Bijbel.
3. San wi musu du efu wi e studeri now nanga wan sma na ini na Anbegi Gado-buku?
3 Efu yu e studeri now nanga wan sma na ini na Anbegi Gado-buku èn yu de na den lasti kapitel fu a buku, dan yu kan bosroiti fu klari a buku dati èn fu gi a studenti deki-ati fu leisi a buku Blijf in Gods liefde gi ensrefi. Efu yu no de so fara nanga na Anbegi Gado-buku, dan a ben o moro bun fu bigin na a fosi kapitel fu a nyun buku. Neleki fa a de nanga a Bijbel leri-buku, dan efu a de fanowdu yu kan luku den prenspari tori na bakasei fu a buku.
4. San wi musu du efu a studenti fu wi e teki dopu bifo a klari a Bijbel leri-buku nanga a buku Blijf in Gods liefde?
4 Efu wan studenti teki dopu bifo a klari den tu buku dati, dan a musu studeri go doro na ini a buku Blijf in Gods liefde teleki a klari a buku disi. Srefi efu a studenti dopu kaba, toku yu kan teri den yuru, a gobaka, nanga a Bijbelstudie dati. A preikiman di e kon makandra nanga yu na a studie dati èn di e teki prati na a studie, kan teri a yuru tu.
5. Fa wi kan gebroiki a buku Blijf in Gods liefde fu yepi sma di no e preiki moro fu wan pisi ten?
5 Efu wan memre fu a Diniwroko Komte fu a gemeente aksi yu fu studeri nanga wan sma di no e preiki moro, dan a kan aksi yu fu studeri wan tu spesrutu kapitel fu a buku Blijf in Gods liefde. Den sortu studie disi no musu hori fu wan langa pisi ten. A de wan moi seti taki wi kisi a nyun buku disi, di meki spesrutu fu yepi wi fu du sani di sa meki taki ’Gado tan lobi wi’.—Yud. 21.