Na heri grontapu wi o gi sma wan kari fu kon na a Memrefesa!
1. Sortu spesrutu wroko wi o du na heri grontapu na ini a pisi ten fosi a Memrefesa?
1 „Tan du disi fu memre mi” (Luk. 22:19). Den anbegiman fu Yehovah e gi yesi na a komando disi di Yesus gi, èn dati meki den o kon makandra tapu 30 maart 2010 fu memre a dede fu Yesus. Den o du disi makandra nanga tra sma di wani sabi moro fu Bijbel. Na heri grontapu wi o prati wan spesrutu papira fu kari sma kon na a Memrefesa, èn wi o du dati fu 13 maart te go miti 30 maart.
2. Fa wi kan gi sma wan kari fu kon na a Memrefesa?
2 Fa fu gi sma wan kari: Yu kan gi na ososma a papira so taki a kan si a prenki na fesisei, èn dan yu kan taki: „Tapu a neti fu 30 maart, milyunmilyun sma na heri grontapu o kon makandra fu memre a dede fu Yesus. Mi kon dyaso fu gi yu nanga yu osofamiri wan kari fu kon na a konmakandra disi. Den mati fu yu kan kon tu.” Sori a sma tu pe a konmakandra disi o hori èn o lati a o bigin. Efu a kan, dan yu kan leisi Lukas 22:19 fu sori a sma taki disi na wan komando di skrifi na ini Bijbel. Ma hori na prakseri taki fu di wi abi wan syatu pisi ten nomo fu wroko a kontren fu wi, meki a ben o bun fu hori a takimakandra syatu.
3. Suma wi kan gi wan kari?
3 Efu a gemeente fu yu abi wan bigi kontren fu wroko, èn sma no de na oso a fosi leisi te yu e tyari a papira gi den, dan den owruman kan taigi yu fu libi a papira na baka. Te yu e gi sma wan kari tapu satra nanga sonde, dan yu kan gi den tijdschrift tu efu a fiti. No frigiti fu gi den gobaka nanga den Bijbelstudenti fu yu wan kari, èn sosrefi sma na yu wrokope, skoromati, famiriman, birtisma, nanga tra sma di yu sabi.
4. San wi o du te wi abi warderi taki Yehovah sori lobi gi wi di a sorgu gi a lusu-paiman?
4 Sreka yusrefi fu du moro: A pisi ten fu a Memrefesa na wan moi ten fu du moro na ini a diniwroko. Yu kan seti sani so taki yu man dini leki yepipionier? Yu abi pikin, noso Bijbelstudenti di e go na fesi? Efu dati de so, dan yu kan taki nanga den owruman fu si efu den nyunwan disi doro den markitiki fu tron preikiman di no dopu ete, so taki den kan teki prati na a spesrutu wroko disi tu. Fu di wi abi warderi taki Yehovah sori lobi gi wi di a sorgu gi a lusu-paiman, meki wi no o go na a Memrefesa wawan, ma wi o kari so furu sma leki wi man fu kon makandra nanga wi na a Memrefesa.—Yoh. 3:16.