„Yu ben o de wan bun pionier!”
1. Fa wan sisa e denki fu a pionierwroko fu en?
1 „Nowan tra wroko ben kan meki mi de so koloku noso gi mi so furu blesi na ini na anbegi fu Yehovah.” Na so Kathe B. Palm ben taki. A sisa disi gi ala en krakti leki pionier èn a du disi someni tenti yari. A preiki fu a noordsei te go miti a zuidsei fu Chili, di de na ini Zuid-Amerika. Kande te wan sma e prakseri a koloku libi fu den wan di e du furuten diniwroko, dan a e taigi yu: „Yu ben o de wan bun pionier!”
2. Fruklari fu san ede wan sma o de koloku trutru te a e du sani di abi fu du nanga na anbegi fu Yehovah.
2 Wan koloku libi: Yesus, na Eksempre fu wi, ben firi prisiri trutru te a ben du a wani fu en Tata (Yoh. 4:34). Fu dati ede, Yesus ben kan taigi den bakaman fu en taki wan sma o de trutru koloku te a e du sani di abi fu du nanga na anbegi fu Yehovah. Wi e firi bun te wi e du sani di Yehovah feni bun. Boiti dati, te wi e gi moro fu wi ten, wi krakti nanga den sani di wi abi fu yepi trawan, dan wi sa de moro koloku.—Tori. 20:31, 35.
3. Sortu prisiri wi kan ondrofeni te wi e gi moro ten na ini a preikiwroko?
3 O moro ten wi e gebroiki na ini a preikiwroko, o moro okasi wi abi fu hori Bijbelstudie, èn dati sa gi wi prisiri. Srefi efu furu ososma no wani arki wi, toku wi sa denki heri tra fasi fu a kontren fu wi te wi e kon kisi moro ondrofeni na ini a preikiwroko. Pionier kan gebroiki ala den sani di den leri na a Pionierskoro pe den kan go baka te den pionier wán yari (2 Tim. 2:15). Te wi e horidoro na ini a wroko disi, dan wi kan prani siri fu a bun nyunsu di o gi froktu bakaten.—Preik. 11:6.
4. San yonguwan di o kaba nanga skoro heri esi, musu prakseri?
4 Yonguwan: Yu prakseri bun san yu o du te yu kaba nanga skoro? Te nanga now, den skorowroko fu yu teki furu fu yu ten. San yu o du nanga a ten dati te yu kaba nanga skoro? Na presi fu suku wan grontapuwroko, yu kan prakseri fu go na ini a gewoon pionierwroko èn begi fu a tori dati. Yu o kon sabi fa fu preiki gi sma fu difrenti kulturu, yu o man sabi fa fu handri nanga sani di muilek gi yu, yu o leri fu dwengi yusrefi èn yu o tron wan moro bun leriman. Den sani disi di yu o leri, o tyari wini kon gi yu na ini yu heri libi.
5. Fa papa, mama, nanga a gemeente kan gi trawan deki-ati fu pionier?
5 Papa nanga mama, unu e yepi un pikin fu du muiti fu go na ini a furuten diniwroko? Den sani di unu e taki èn a bun eksempre fu unu kan yepi den pikin fu poti Kownukondre afersi na a fosi presi (Mat. 6:33). Ray, di bigin pionier baka di a kaba nanga skoro, e taki: „Ala ten mi mama ben feni taki a pionierwroko na a moro bun sani di wan sma kan du fu abi wan koloku libi.” Ala sma na ini a gemeente kan gi trawan deki-ati fu pionier. Den kan du dati nanga den sani di den e taki èn den sani di den e du fu horibaka gi den. Jose, di e libi na ini Spanyorokondre, e taki: „A gemeente fu mi e si a pionierwroko leki a moro bun wroko di yonguwan kan du. Den sani di den taki, a warderi di den abi gi a pionierwroko èn a yepi di den gi, meki en moro makriki gi mi fu bigin pionier.”
6. San wi kan du efu wi no abi na angri now fu pionier?
6 No meki noti tapu yu: Ma kon meki wi taki dati yu feni taki yu no abi na angri fu pionier. Efu na so yu e denki na a bigin, dan begi Yehovah èn fruteri en fa yu e firi. Yu kan taigi en: ’Mi no sabi efu mi o man du a pionierwroko, ma mi wani du san yu feni bun’ (Ps. 62:8; Odo 23:26). Dan suku a tiri fu en di a e gi nanga yepi fu en Wortu èn en organisâsi. Furu gewoon pionier ben „tesi” a pionierwroko fu di den ben bigin leki yepipionier. A prisiri di den ben ondrofeni, meki taki den du muiti fu go na ini a furuten diniwroko.—Ps. 34:8.
7. San wi kan du te wi e tweifri efu wi man doro den 70 yuru ibri mun?
7 Ma san yu kan du efu yu no de seiker taki yu man doro den 70 yuru ibri mun? Fu san ede yu no e taki nanga pionier di de na ini a srefi situwâsi leki yu? (Odo 15:22) Dan meki wan tu schema di yu kan gebroiki. Yu kan kon si taki a no muilek so fu bai ten puru fu sani di no de so prenspari fu du a diniwroko.—Ef. 5:15, 16.
8. Fu san ede wi musu luku a situwâsi fu wi ten na ten?
8 Luku yu situwâsi baka: Nofo tron a situwâsi fu wan sma e kenki. Fu dati ede a bun taki ten na ten yu e luku a situwâsi fu yu baka. Fu eksempre, a de so taki heri esi yu o go nanga pensyun? Randy, di go nanga pensyun frukufruku, e taki: „A bosroiti disi meki taki mi ben man bigin du a gewoon pionierwroko makandra nanga mi wefi. Boiti dati, a gi wi na okasi fu froisi go dini na presi pe moro preikiman de fanowdu. Mi kisi bun furu blesi di mi teki a bosroiti dati, ma a moro bigi blesi na taki mi abi wan bun konsensi.”
9. San trowpaar musu go ondrosuku?
9 Baka di son trowpaar ondrosuku a situwâsi fu den finifini, den kon si taki den ala tu no abi fu wroko ibri dei na ini a wiki. A tru taki disi wani taki kande dati na osofamiri musu tyari wan tu kenki kon na ini a fasi fa den e libi, ma a sani disi no o de fu soso. No so langa pasa, John en wefi libi a wroko di a ben e du ibri dei na ini a wiki, fu kan du moro na ini a preikiwroko. John e taki: „Nowan sani e gi mi moro prisiri leki fu sabi taki te dei opo mi wefi e du diniwroko gi Yehovah.”
10. San e meki taki Kresten e prakseri fu go pionier?
10 Wan fasi fu sori lobi nanga bribi: Yehovah meki a preikiwroko de a moro prenspari wroko di iniwan fu wi kan du. Heri esi na owru sistema disi o kisi pori, èn na soso den sma di e kari a nen fu Yehovah, o kisi frulusu (Rom. 10:13). Te wi ati furu nanga lobi gi Yehovah èn te wi de nanga tangi gi den sani di a du gi wi, dan dati o meki taki wi gi yesi na a komando di wi kisi fu en Manpikin, fu preiki fayafaya (Mat. 28:19, 20; 1 Yoh. 5:3). Boiti dati, te wi e bribi trutru taki wi e libi na ini den lasti dei, dan wi no o gebroiki den sani fu a grontapu disi dorodoro, ma wi o du ala san wi man na ini a preikiwroko na ini a ten di tan abra ete.—1 Kor. 7:29-31.
11. Fa wi musu si en te wan sma e taigi wi taki wi ben o de wan bun pionier?
11 Te wan sma e du a gewoon pionierwroko, dan a no e du disi nomo fu horibaka gi wan seti na ini na organisâsi, ma a e du dati fu sori taki a lobi Gado trutru. Fu dati ede efu wan sma taigi yu taki yu ben o de wan bun pionier, dan yu musu breiti fu di a sma e taigi yu wan bun sani. Boiti dati, go prakseri èn begi fu go na ini a pionierwroko makandra nanga den wan di e du a wroko disi, di e meki sma de koloku.
[Prenspari pisi na tapu bladzijde 4]
Papa nanga mama, unu e yepi un pikin fu du muiti fu go na ini a furuten diniwroko?
[Prenspari pisi na tapu bladzijde 5]
Yehovah meki a preikiwroko de a moro prenspari wroko di iniwan fu wi kan du.