Yu ben de wan gewoon pionier fosi?

1. Sortu grani furu sma ben abi, ma san sonwan fu den ben musu du?

¹ Na ini den yari di pasa, dusundusun sma ben abi a moi grani fu gi sma leri èn fu fruteri den a bun nyunsu, leki furuten-dinari (Tori. 5:42). Ma sonwan fu den ben musu tapu nanga a pionierwroko fu difrenti reide ede. Efu yu ben de wan gewoon pionier fosi, dan yu kan luku a situwâsi fu yu now fu si efu yu man pionier baka?

2. Fu san ede den sma di ben pionier fosi musu luku a situwâsi fu den now?

² Situwâsi e kenki: A kan taki a situwâsi di ben meki taki yu tapu nanga a pionierwroko, kon kenki. Kande yu ben tapu nanga a pionierwroko fu di yu no ben man doro den 90 yuru ibri mun. Now den saka den yuru kon tron 70 yuru ibri mun. Disi e meki taki yu kan bigin pionier baka? A de so taki yu no abi fu wroko so furu moro, noso yu no abi so furu frantwortu moro fu sorgu gi yu osofamiri, sensi a ten di yu tapu nanga a pionierwroko? Wan sisa di no ben pionier moro fu di a ben siki, ben man bigin pionier baka di a ben abi 89 yari. A ben komoto na ati-oso moro leki wán yari kaba èn a ben firi taki a ben o man pionier baka!

3. Fa famiriman kan wroko makandra fu yepi wan memre fu a famiri fu pionier?

³ Kande yu no ben pionier fosi, ma wan famiriman fu yu tapu nanga a pionierwroko, fu sorgu gi wan sma na ini a famiri, soleki en papa noso mama di kon owru (1 Tim. 5:4, 8). Efu dati de so, dan yu, noso tra memre fu na osofamiri kan du moro fu yepi a sma di tapu nanga a pionierwroko? Fu san ede unu no e taki fu a tori? (Odo 15:22) Te famiriman e seti sani so, taki wan memre fu na osofamiri man pionier, dan alamala e du wan trutru bun sani.

4. San yu kan du efu now yu no man pionier baka?

⁴ No lasi-ati efu now a situwâsi fu yu no e gi yu pasi fu bigin pionier baka. Yehovah breiti fu si taki yu de klariklari fu du a wroko disi (2 Kor. 8:12). Gebroiki den sani di yu leri di yu ben pionier na ini a diniwroko di yu e du now. Fruteri Yehovah na ini begi taki yu wani pionier, èn de na ai fu si efu okasi e opo kon di kan kenki a situwâsi fu yu (1 Yoh. 5:14). Kande Yehovah o ’opo wan bigi doro gi yu fu go wroko’ so taki yu kan abi a prisiri baka fu dini leki gewoon pionier!—1 Kor. 16:9.