Joe kan kon baka ini den lin foe den pionier?
1 Ini den lasti feifi jari di pasa, son gewoon pionier ben feni en fanowdoe foe gowe libi den lin foe den pionier. Joe ben de wán foe den? Efoe dati de so, dan tweifri no de taki joe ben abi reide foe libi a grani disi. Kande a ben de wan sani di joe no ben froewakti noso di joe no ben man doe noti na en. A reide dati de ete? Efoe na gosontoe, problema na moni sei, noso froeplekti di joe ben abi na joe osofamiri, ben meki taki joe ben abi foe tapoe nanga a wroko disi, dan den omstandigheid foe joe kon moro boen now? Joe ben kan tjari wan toe reidelek kenki kon, so taki joe kan njan boen baka foe den blesi di e kon foe a gewoon pionier wroko? Joe ben prakseri foe aksi baka foe pionier?
2 So leki fa joe sabi, dan foe abi boen bakapisi leki pionier, joe moesoe orga sani boen èn joe abi wan boen schema fanowdoe. Ala di foeroetron joe no abi foeroe ten gi ontspanning, tokoe den sjatoe momenti te wan pionier e rostoe, nofo tron e sori foe de momenti di e gi moro satisfaksi èn di e pai moro (Odo 19:17; Tori. 20:35). Foe di joe e tan abi foeroe foe doe ini a diniwroko, meki joe e kisi kibri foe feti baka wan libi di e soekoe en eigi wini nomo, wan makriki libi, di grontapoe e feti na en baka. Jehovah pramisi kaba taki a sa meki joe kon goedoe na jeje fasi, efoe joe e òfer joesrefi èn joe e poti Kownoekondre afersi na a fosi presi. Seiker joe sa ondrofeni troe prisiri èn joe sa abi satisfaksi, foe di nanga joe heri ati joe de ini a diniwroko foe Jehovah. — Odo 10:22; Kol. 3:23, 24.
3 A de so, taki wi moesoe si a foeroeten diniwroko leki wan grani di de gi wan toe spesroetoe sma nomo? Nôno. Te wi e prakseri a pramisi foe wi dati wi gi wi libi abra na Jehovah, dan ibri kresten moesoe poti serjoesoe prakseri foe doe a foeroeten diniwroko, boiti te omstandigheid e meki taki wi no kan doe dati. — Mark. 12:30.
4 Efoe joe gosontoe nanga efoe frantiwortoe di skrifi ini bijbel, krinkrin no e gi joe na okasi foe pionier nojaso, dan joe kan de seiker taki Jehovah sabi èn e froestan dati. A sa pai joe foe a getrowfasi di joe e sori na ini san joe man doe ini joe omstandigheid (1 Kor. 4:2; 2 Kor. 8:12). Ma, efoe nojaso a gersi taki a boen foe joe go pionier baka, dan foe san ede joe no e go taki nanga a fesiman opziener èn aksi foe wan formulier?
5 Joe famiri kan jepi joe? Kande joe libi a pionierwroko, foe di joe ben froeplekti foe go sorgoe gi joe osofamiri. A kan taki nojaso tra memre foe na osofamiri de ini a posisi foe jepi, so taki joe kan doe a pionierwroko baka? Gi son wan, soso wan pikinso jepi foe sorgoe gi spesroetoe frantiwortoe, kan meki den doe a pionierwroko baka.
6 Kande te tra memre foe na osofamiri e wroko boen makandra èn e doe pikinso moro moeiti, dan dati kan gi joe na okasi baka. A jepi kan kon, foe di den e jepi na moni sei noso nanga vervoer, so srefi meki mofo doronomo foe wroko makandra na ini a diniwroko. Tra fasi kan de fa den kan jepi toe. Efoe den omstandigheid no e gi joe na okasi foe teki a grani disi foe diniwroko baka, dan kande wan tra memre foe na osofamiri di man doe dati, kan kisi a jepi disi.
7 Foe san ede oenoe no e taki makandra foe na afersi disi leki wan osofamiri? Kande wan memre kan tron wan pionier, efoe oenoe e meki en wan afersi foe wroko makandra na ini na osofamiri. Efoe wan tra pionier kan kon na ini den lin toe, dan a heri osofamiri kan firi nanga reti taki den abi wan prati toe. So wan jeje di lobi foe gi, no wawan sa meki taki moro kotoigi foe a Kownoekondre sa gi ini a kontren, ma a sa meki toe taki na osofamiri kon moro krosibei na makandra na jeje fasi toe. — Luk. 6:38; Fil. 2:2-4.