Joe sa poti joesrefi heri esi na ini a groepoe foe pionier
1 A jari di psa na a ten disi dan foeroe brada nanga sisa ben wegi go wegi kon ondro begi foe go na ini na gewone pionierdienst. Wan meki plan finifini ben jepi foeroe foe go dini Jehovah tapoe na spesroetoe fasi disi èn na so fasi na nomroe foe gewone pionier ben go foe 36 na ini augustus 1985 go miti 42 na ini oktober, wan gro foe 6. Joe de a mindri den sma di e denki foe go poti densrefi na ini na dienstjari 1987 ini na groepoe foe den gewone pionier?
ONDROSOEKOE DEN OMSTANDIGHEID FOE JOE
2 Kande den span tori foe theokratis gro no so langa psa kaba ben wiki na ini joe na lostoe foe abi wan moro bigi prati na a kotiwroko di e doe nownow srefsrefi (Matth. 9:37, 38; Jes. 60:22). Dati de heri boen! Ma foe meki na lostoe disi kon troe dan joe toe moe meki wan plan finifini èn fertrow dorodoro tapoe Jehovah (Rom. 12:1; Luk. 14:28). Te joe go ondrosoekoe den omstandigheid foe joe njoenjoen, dan kande joe kan kisi a jepi foe si sortoe kenki de fanowdoe foe go na ini na foeroetendienst. Joe ben sa kan tjari wan kenki kon na ini joe grontapoewroko foe meki presi gi na pionierdienst? Joe kan go libi moro eenvoudig foe meki moro ten nanga krakti fri gi Jehovah wroko? (Luk. 11:34) Te joe e wroko makandra leki wan groepoe, dan wantoe osofamiri ben kan seti en so dati wan ofoe moro sma foe na osofamiri nanga jepi foe den trawan ben kan pionier.
MEKI JOE BRIBI NANGA FAJA KON MORO BIGI
3 Foe go na ini a pionierdienst èn foe tan na ini joe abi wan tranga bribi fanowdoe. Efoe joe wani kisi wan moro tranga bribi, meki dan plan foe gi moro ten na a prékiwroko èn foe ondrofeni na a fasi dati a jepi foe Jehovah (2 Thess. 1:3). Gi foeroe sma na jepi-pionierdienst de wan broki foe go na a gewone pionierdienst. Kande dati kan de gi joe ooktoe so.
4 Te joe bribi e kon moro bigi, dan a faja foe joe sa kon moro bigi toe. Te joe e seti sani foe someni leki a kan foe wroko nanga den sma di de kaba na ini na gewone pionierdienst, dan na eksempre foe den foe faja èn na prisiri di den e sori sa gi tranga foe wroko moro fara na a plan foe joe foe go pionier. Pionier di abi ondrofeni kan jepi joe foe meki wan praktis schema gi na pionierdienst boen rai.
OEN JONGOEWAN — OEN MEKI BOEN PLAN GI A TEN DI E KON
5 Foeroe foe oenoe, den jongoe brada nanga sisa, ben klari no solanga psa kaba na ferprekti skoroleri. A no de foe taki Dati nofotron joe e prakseri serjoesoe foe na tamara foe joe. Te joe e meki plan foe dati, sorgoe dan foe ’prakseri joe moro bigi Mekiman’ èn foe hori en rai di de foe a ten disi na ini prakseri. Teki serjoesoe na sani san a abi gi na grontapoe èn gi na libismafamiri serjoesoe a prakseri (Prékiman 12:1). Te na ini a njoen dienstjari joe e teki na pionier wroko na tapoe joe, dan joe kan kibri joesrefi tége na sani dati joe ben go poti joesrefi tapoe afersi di no de so prenspari èn di ben sa kan hari joe poeroe foe troetroe marki foe joe na ini na libi (Odo 10:22). Meki a de so dati a prisiri èn na satisfaksi di joe e ondrofeni na ini na foeroetendienst foe di joe „e tesi èn e si dati Jehovah de boen”, sa poesoe joe meki a dienst disi de wan wroko gi joe heri libi. — Psalm 34:8.
6 Na warderi foe dini Jehovah moe boewégi wi foe doe someni leki wi kan na ini en dienst. Gi den sma di den omstandigheid e gi pasi foe dati, disi kan wani taki dati den go poti densrefi na ini den groepoe foe den pionier. Ma trawan kande de ini den omstandigheid pe dati no de mogelek ete. Ma wi alamala kan tan poti na afersi na ini begi na fesi Jehovah èn na so fasi sori dati wi abi na pionier jeje. Sowan di e dini now leki gewone pionier, ben prakseri wan dé dati den no ben kan pionier, ma den omstandigheid kan kon kenki foe wi no abi wawan na lostoe ma ooktoe e meki plan finifini èn e begi Jehovah efoe a wani blesi den moeiti foe wi dini en nanga ala wi krakti di wi abi (Odo 16:3; Mal. 3:10). Meki wi alamala wroko na a marki dati èn meki boen plan gi a ten di e kon.