Na gewone pionierdienst — Wan kari foe go ini moro bigi kolokoe
1 Fa joe e doe tapoe wan kari foe teki prati na wan activiteit di e gi joe prisiri nanga kowroe ati? A de seker dati joe sa teki en nanga tangi èn nanga prisiri. Jezus ben gi en discipel wan switi kari di ben sa gi den kolokoe nanga kowroe ati di ben sa tan. A ben taki: „Teki joe tjatjari tapoe, joe èn leri foe mi, . . . èn joe sa feni kowroe ati gi joe sili.” Na tjatjari foe kristelek discipelschap wani taki dati te now ete tra sma e kisi kari foe abi wan prati na a préki foe na boen njoensoe foe na Kownoekondre. Na gewone pionierwroko de wan toemoesi moi fasi foe meki na prati foe joe na ini na wroko disi èn ini na kolokoe èn kowroe ati di a e tjari kon nanga en kon moro bigi. — Matt. 11:28-30; 28:19, 20.
2 Foe sensi na dienstjari 1979 na gemiddelde nomroe foe gewone pionier ini Suriname gro nanga 104%. Wi kren foe wan gemiddelde foe 24 gewone pionier ini 1979 go na wan gemiddelde foe 49 ini a dienstjari 1986. San na wán boskopoe di na ipi disi foe foeroeten wrokoman di e kon moro bigi e tjari kon abra? Dati wan nomroe di e kon moro bigi foe Kownoekondreprékiman e feni kolokoe nanga, tevredefasi foedi den e span densrefi na ini Jehovah dienst. Na faja foe den ben tjari trawan go so fara foe go prakseri serjoesoe efoe a no de mogelek gi den foe seti den afersi foe den ook so toe dati den kan tron gewone pionier. Joe e loekoe na mogelekheid disi na ondro begi?
SOEMA KAN PIONIER?
3 Wan jongoe brada di ini a ten foe en lasti skoro jari ben go ini na gewone pionierdienst, ben ferteri: „Ini mi heri libi mi no ben de noiti ete so kolokoe.” Bakadi wan mama foe toe pikinnengre ben bigin na september disi di psa foe pionier, a ben taki: „Mi de now moro kolokoe leki mi ben de oiti.” Bakadi wan tra sisa ben lasi en man na ini dede, a ben skrifi: „Mi e gi dek’ati na ala sma di efoe den kan, foe teki na pionierdienst a den tapoe. A kan hari joe soso kon moro krosbé na Jehovah èn joe gemeente.” Fa den sma disi bréti dati den ben gi jesi na a kari foe go ini na gewone pionierdienst!
4 Wi kan overtoigi wisrefi makriki dati wi no kan pionier. Ma te wi loekoe wi situwasi na ondro begi, dan wi kan kon sabi ofoe wi omstandigheden sa gi pasi dati wi poti wisrefi na ini a groepoe foe den gewone pionier. Wan sisa di e dini now nanga prisiri leki wan gewone pionier, ben erken dati efoe a ben go wegi den rede, foe en foe no de gewone pionier kontrari den rede foe san-ede a ben moesoe doe dati dan a e kon a krin dati a ben moesoe foe, teki a pionierdienst a en tapoe. A ben wini a sjensjen fasi foe en èn a ben meki en bribi nanga lobi gi Jehovah wini. — Loekoe Prék. 11:4.
5 Joe e go pikinmoro nanga pensioen ofoe joe kisi pensioen kaba? Efoe joe gosontoe èn joe omstandigheden e gi pasi dati joe tron gewone pionier, dan joe libi ekstra ben sa wani taki wan sani moro. Dan joe abi trowpaar di nownow no abi frantwortoe foe a sorgoe foe pikin. Efoe joe de na ini a situwasi disi dan joe kan meki na kolokoe foe joe kon moro bigi foe di joe e go ini na gewone pionierdienst?
6 Den sma di e pionier bifo den bigin foe abi wan osofamiri, bakaten kan prisiri na ini a winimarki dati den kan taki foe ondrofeni te den gi den pikin foe den dek’ati foe go denki foe na pionierdienst leki wan marki foe go waka na en baka. Sonwan ben man srefi foe tan pionier aladi den e tan kweki wan osofamiri (Odo 22:6). Foeroe gewone pionier ini Sranan de trow brada nanga sisa, na mindri soema boen foeroe de di abi pikin èn tokoe den ben seti den omstandigheden so dati den kan pionier. Fa wan positief jeje atmosfeer e kon nanga dati na ini oso!
7 Moro leki afoe foe na heri nomroe foe pionier na ini Sranan de foe sma di no trow etc. Foeroe foe den no abi nowan osofamiri frantwortoe èn den onderken wantewante na okasi di ben opo gi den foe prisiri Jehovah ati, aladi den ben meki na kolokoe foe den kon moro bigi foe di den e dini leki gewone pionier.
8 Kande pikinmoro joe klari nanga joe grontapoe skoro opleiding. San joe e go doe efoe joe kisi joe diploma? Jezus ben gi na rai foe hori na „ai soifri” èn foe no gi pasi dati sani na skinfasi nanga gemakrikifasi tron den moro prenspari sani na ini a libi. Wan boen strélonman sabi taki a de wan koni sani foe poeroe ala sani san de wan hebi èn di ben sa, tapoe en foe wini na strélon. Den kans foe joe dati a waka boen foe wini na boenati foe Gado Jehovah èn foe tan farawe foe grontapoe trapoe, ooktoe sa kon moro boen te joe tan druk bezig ini Jehovah dienst. Pionierwroko e meki na dini foe joe foe Gado kon moro bigi èn e gi joe rede foe gi joesrefi krinkrin na jeje sani. Efoe joe omstandigheden e gi joe pasi, a no de so dati joe moe loekoe en foe dat’ede leki wan ferplekti foe de wan gewone pionier? — Matt. 6:22; 1 Kor. 15:58; 1 Tim. 6:7, 8.
9 Na kolokoe foe wi now èn na ini na tego ten di e kon e komoto foe a doe foe Jehovah wani. Jezus ben meki en kon a krin pasa marki nanga san a ben leri èn ben doe (Joh. 4:34; Hebr. 12:2). Te wi de druk bezig foe kari tra sma ’foe teki na watra foe libi foe soso’ dan wi égi libi sa de na sani di e gi moro foeroe satisfaksi. Joe kan meki joe kolokoe kon moro bigi foedi joe e teki na kari disi tapoe wan boen fasi foe tron wan gewone pionier? — Openb. 22:17; Odo 11:25.