Abi bun bakapisi te yu e du stratiwroko
1. Na sortu fasi wi kan teki na eksempre fu Yesus?
1 Di Yesus ben du a diniwroko fu en na grontapu, dan a no ben draidrai fu taki nanga sma di a ben miti na pasi èn na tra presi pe furu sma ben de (Luk. 9:57-61; Yoh. 4:7). A ben wani prati a prenspari boskopu fu en nanga so furu sma leki a ben man. Na ini a ten disi, stratiwroko na wan heri moi fasi fu yepi sma fu kon kisi a koni fu Gado (Odo 1:20). Wi o abi moro bun bakapisi te wi e waka go miti den sma èn te wi e sori taki wi abi a koni fu si sani krin.
2. Fu san ede wi musu waka go miti sma te wi e du stratiwroko?
2 Waka go miti a sma: Nofo tron a moro bun fu waka go miti sma na presi fu tanapu noso sidon wakti na wan presi teleki sma kon na yu. Lafu pikinso nanga a sma, luku en, èn sori switifasi. Efu yu e wroko nanga tra preikiman, dan a moro bun te wán fu unu e waka go miti wan sma. Yu musu meki muiti tu fu miti sma baka di ben sori taki den wani sabi moro. Efu a fiti, dan na a kaba fu a takimakandra yu kan aksi a sma na wan switi fasi fa yu kan miti en baka. Son preikiman gwenti du stratiwroko na a srefi presi. Disi e meki taki den man taki nanga den srefi sma ibri tron baka èn na so den man yepi den fu kon sabi moro.
3. Fa wi kan sori taki wi abi a koni fu si sani krin te wi e du stratiwroko?
3 Abi a koni fu si sani krin: Denki bun fosi yu bosroiti pe yu o tanapu fu du stratiwroko èn nanga suma yu o taki. A no de fanowdu fu preiki gi ibri sma di e waka pasa. Luku bun san e pasa na yu lontu. Fu eksempre, te wan sma e hasti ensrefi, dan kande a moro bun fu meki a pasa. Te yu e du stratiwroko na fesi wan wenkri noso bisnis, dan luku bun taki a basi no e feni en fruferi taki yu de drape. Nofo tron a moro bun fu preiki gi sma te den e komoto na ini a wenkri, na presi fu du dati te den e go na inisei. Te yu e waka go miti sma, dan du dati na wan fasi di no o meki den frede noso skreki. Sori taki yu abi a koni fu si sani krin te yu e gi sma publikâsi. Efu yu e si taki a sma no de so fayafaya fu leisi tijdschrift, dan yu kan gi en wan traktaat na presi fu wan tijdschrift.
4. Fu san ede stratiwroko e meki wi abi bun bakapisi èn e gi wi prisiri?
4 Te wi e du stratiwroko, dan dati e meki taki wi man fruteri furu sma den tru tori fu Bijbel èn wi man du dati na ini wan syatu pisi ten (Preik. 11:6). A kan de so tu, taki son sma di wi e miti, na den sma di no de na oso te wi e preiki oso fu oso. Fu san ede yu no e seti sani fu du stratiwroko? Te wi e preiki na a fasi disi, dan dati o gi wi prisiri èn wi o abi bun bakapisi.