’Meki Gado nen de santa’
1. San na a thema fu a kring konmakandra fu a dienstyari 2012, èn pe a teki puru?
1 Wi abi a bigi grani fu tyari a nen fu a Moro Hei Tiriman, Yehovah! Na Gado srefi gi wi a nen fu en fu tyari, èn spesrutu sensi a yari 1931 sma sabi wi leki Yehovah Kotoigi (Yes. 43:10). Yesus, a wan-enkri Manpikin fu Gado, ben abi furu lespeki gi a nen fu Gado, èn dati ben de a fosi sani di a ben taki fu en na ini a begi di a leri den bakaman fu en (Mat. 6:9). A thema fu wi kring konmakandra fu a dienstyari 2012, teki puru fu den wortu dati fu Yesus. A thema na: „Meki Gado nen de santa.”
2. San wi o yere na a kring konmakandra di e kon?
2 San wi o yere: Tapu satra, a lezing di nen „Wroko leki furuten dinari fu meki sma kon sabi a nen fu Gado”, o sori fu san ede a furuten diniwroko e gi wi prisiri na ini a libi. Wi o yere a symposium tu di nen „Luku bun taki yu no e gi Yehovah porinen”. A symposium disi o yepi wi fu wai pasi gi fo sani di kan de wan trapu gi wi. Na ini a lezing „Fu san ede a nen fu Gado musu de santa”, wi o kisi piki tapu den aksi disi: San o yepi wi fu preiki fayafaya aladi furu sma no e sori taki den wani kon sabi moro fu Gado? San o yepi wi fu du wi diniwroko na wan bun fasi? Tapu sonde wi o arki wan symposium di abi fo pisi, èn di o sori wi fa wi kan santa a nen fu Gado nanga yepi fu den prakseri fu wi, den sani di wi e taki, den bosroiti di wi e teki, èn a fasi fa wi e tyari wisrefi. Spesrutu den nyunwan o lobi a publikitaki di nen „Yehovah o santa en bigi nen na Armagedon”.
3. Sortu grani wi abi, èn fa a kring konmakandra o yepi wi?
3 Heri esi Yehovah o du wan sani fu santa en nen (Esek. 36:23). Fosi a ten dati doro, wi abi a tumusi moi grani fu hori a santa nen fu Yehovah hei, èn ala sani di abi fu du nanga a nen fu en. Wi de seiker taki a kring konmakandra disi o yepi ibriwan fu wi fu tyari a seryusu frantwortu di wi abi leki sma di e tyari a nen fu Gado, na wan bun fasi.