Taki-go-taki-kon nanga na ososma fu yepi en
1. Sortu fasi moro bun fu taki nanga sma na ini a preikiwroko?
1 Sortu fasi moro bun fu taki nanga sma na ini a preikiwroko? Na te yu e taigi na ososma san a musu bribi, noso te yu e taki-go-taki-kon nanga en èn e yepi en fu frustan fa wan tori de trutru? Na apostel Paulus ben taki-go-taki-kon nanga den Dyu na Tesalonika, èn „a bakapisi ben de taki wan tu fu den tron bribiman” (Tori 17:2-4). Fa wi kan taki-go-taki-kon nanga wan sma?
2. Fa wi kan waka baka na eksempre fu Paulus te wi e preiki a bun nyunsu?
2 Luku fa a sma e denki èn fu san ede a e denki so: Efu wi wani taki-go-taki-kon nanga wan sma, dan wi musu sabi fa den sma na ini a kontren fu wi e denki fu sani. Na a Areopagus, Paulus ben bigin taki nanga den Grikisma di no ben de na bribi, èn a ben taki fu sani di den ben sabi èn di den ben bribi (Tori 17:22-31). Fu dati ede, te yu e sreka yusrefi fu taki nanga sma na ini yu kontren, dan luku fosi san furu sma e bribi èn luku sortu fowtu denki den abi (1 Kor. 9:19-22). Efu na ososma no e agri nanga yu, dan pruberi fu sabi fosi nanga san a e agri èn taki fu dati.
3. Fa wi kan poti aksi na wan koni fasi so taki wi kan taki-go-taki-kon moro bun nanga sma?
3 Poti aksi na wan koni fasi: Wi no kan taigi wan sma di wani go na wan presi, pe a musu waka fu doro a presi, sondro fu sabi fosi pe a sma de nownow. Na so a de tu taki wi no o man yepi wan ososma fu feni a yoisti piki, te wi no sabi fa a e denki nownow fu a tori. Fosi Yesus ben taki-go-taki-kon nanga wan sma, a ben poti aksi fu sabi fa a sma e denki. Fu eksempre, di wan sma ben aksi Yesus: „San mi musu du fu kisi têgo libi?”, dan Yesus poti aksi fosi gi a man fu sabi san ensrefi e denki (Luk. 10:25-28). Na wan tra okasi, di Petrus no piki wan aksi bun, dan Yesus poti aksi gi en na wan koni fasi so taki a ben kan si a tori na a yoisti fasi (Mat. 17:24-26). Fu dati ede, te na ososma poti wan aksi noso te a no gi wan bun piki, dan wi kan poti aksi gi en so taki a kan denki fu a tori.
4. Fu san ede wi musu pruberi fu meki na ososma taki-go-taki-kon fu wan tori?
4 Te wi e yepi na ososma fu taki-go-taki-kon fu wan tori, dan wi e waka baka na eksempre fu a Bigi Leriman, Yesus, èn sosrefi tra preikiman na ini a fosi yarihondro di ben sabi preiki bun. Na a fasi disi wi e sori taki wi e warderi na ososma èn taki wi e lespeki en (1 Petr. 3:15). A bakapisi kan de taki a sma o wani taki wi kon baka na en.