Yu de srekasreka te wan sani ben o pasa nanga yu?
A kan pasa wantronso taki wi abi datrayepi fanowdu (Yak. 4:14). Fu dati ede wan koni sma o sreka sani na fesi so furu leki a man (Odo 22:3). Yu bosroiti kaba sortu datrayepi yu o teki èn yu skrifi dati tapu yu karta? Fu yepi yu teki a bosroiti disi, meki a DVD Transfusiealternatieven—De behoeften en rechten van de patiënt, tyari kon na doro. Te yu o luku a di fu tu pisi tapu a DVD disi di nen Transfusiealternatieven-Documentaires, dan luku efu yu kan piki den aksi di e kon now. Fu di a DVD abi wan tu syatu pisi na ini pe datra e du oparâsi, meki papa nanga mama musu bosroiti efu den o luku a DVD disi makandra nanga den yongu pikin fu den.
(1) Fu san ede son datra e bigin denki tra fasi fu a gi di den e gi sma brudu? (2) Kari dri eksempre fu muilek oparâsi di datra du sondro fu gi brudu. (3) Fu san ede datra na heri grontapu de klariklari fu yepi sikisma sondro fu gi den brudu? (4) Di sma du ondrosuku na ini wan tu ati-oso no so langa pasa, dan san disi tyari kon na krin fu sma di teki brudu? (5) San kan pasa nanga wan sma di teki brudu? (6) San datra kon si fu den wini di sma e kisi te den e gebroiki tra dresi na presi fu brudu? (7) San e meki taki wan sma no abi nofo brudu, noso redi brudu-cel? Sortu yepi de gi sma di no abi nofo brudu, noso redi brudu-cel? (8) San datra kan du so taki wan sma en skin kan meki moro redi brudu-cel? (9) San datra kan du fu meki taki sikisma no lasi tumusi furu brudu te den e du oparâsi? (10) A de so taki den dresi di sma e gebroiki na presi fu brudu, kan yepi yongu pikin, noso sikisma di de fu dede? (11) San na wán fu den moro prenspari gronprakseri di datra musu hori densrefi na en, te a abi fu du nanga bun datrayepi?
A de na ibriwan sma fu bosroiti gi ensrefi efu a wani teki sonwan fu den datrayepi di de fu si na ini a DVD disi, èn a bosroiti di a o teki musu kruderi nanga a konsensi fu en. Fu dati ede, no wakti teleki wan sani pasa fosi yu o go luku san yu wani noso san yu no wani. Kapitel 7 fu a Gado lobi-buku nanga den tra sani di kari na ini a kapitel dati, èn na inibere pisi fu Wi Kownukondre diniwroko fu november 2006 sa yepi yu fu teki yu eigi bosroiti di e kruderi nanga den sani di yu leri. Baka dati, skrifi a bosroiti di yu teki na tapu a karta di de gi den sma di dopu èn sorgu taki yu abi a karta na yu ala ten.
[Prenspari pisi na tapu bladzijde 3]
Yu bosroiti kaba sortu datrayepi yu o teki èn yu skrifi dati tapu yu karta?