No frede fu preiki na ini bisnis kontren
1. Fu san ede wi no musu lasi-ati te wi e senwe fu preiki na ini bisnis kontren?
1 Yu e senwe te yu musu preiki na ini bisnis kontren? Efu dati de so, dan no lasi-ati. Srefi Paulus di ben no ben frede fu preiki ben musu teki „deki-ati” fu preiki (1 Tes. 2:2). Na ini den paragraaf di e kon wi sa luku san kan meki taki wi e frede fu preiki èn san wi kan du fu no frede.
2. Fu san ede wi no musu broko wi ede taki wi o meki den wrokoman ati bron te wi e preiki gi den?
2 Den wrokoman ati o bron te wi o preiki gi den te den e wroko? Na ini furu bisnis nanga wenkri wrokoman sabi taki sma o kon drape èn fu dati ede den de klariklari fu yepi den sma disi. Nofo tron den wrokoman e sori switifasi fu di den e si yu leki wan klanti. Te wi e weri krosi na wan fasi di fiti èn te wi e sori switifasi, dan dati kan meki taki a wrokoman sori lespeki gi yu.
3. San wi kan du fu no fruferi den klanti?
3 Mi o abi fu preiki na fesi furu klanti? Efu a kan, yu kan go na wan ten te furu klanti no de na ini a wenkri, soleki syatu baka te a wenkri opo. Wakti teleki a basi noso a wrokoman fu a wenkri de en wawan fosi yu e preiki gi en. Taki syatu nanga a sma.
4. San wi kan taki te wi e wroko na ini bisnis kontren?
4 San mi musu taki? Taki nanga a basi efu moro wrokoman de. Kande yu kan taki: „Nofo tron wi no e miti sma di e wroko na ini wenkri na den oso, èn fu dati ede wi e kon na yu na yu wrokope. Mi sabi taki yu e wroko, èn dati meki mi no o taki langa.” Fu di wi no wani taki sma e si wi leki sma di e kon seri sani, meki a moro bun fu no taki dati den kan gi wan bijdrage boiti efu a sma srefi e aksi fa wi e pai den kostu gi a wroko fu wi. Luku fosi efu a fiti na ini a wenkri, dan yu kan aksi a basi primisi fu taki syatu nanga den wrokoman. Taki a srefi sani leki san yu taigi a basi te yu e taki nanga den wrokoman. Efu yu e si taki a wrokoman e du wan sani, dan taki moro syatu nanga en èn gi en wan traktaat. Efu yu no kisi primisi fu taki nanga den wrokoman, dan kande yu kan aksi fu libi wan tu buku noso tijdschrift na a presi pe den wrokoman e teki den pauze.
5. Fu san ede wi kan preiki na ini bisnis kontren sondro fu frede?
5 Yesus nanga Paulus no ben frede fu preiki gi sma na den presi pe den ben e wroko, èn yu no abi fu frede tu (Mat. 4:18-21; 9:9; Tori 17:17). Aksi Yehovah fu yepi yu so taki yu ati no de na dyompo èn fu abi deki-ati (Tori 4:29). Ala ten yu sa feni sma na ini den bisnis kontren. Fu dati ede, yu kan pruberi fu preiki na bisnis kontren.