Fa fu preiki na ini bisnis kontren
1. San na wan tu winimarki te yu e preiki na ini bisnis kontren?
1 Fa yu ben o feni en fu preiki na ini wan birti pe sma breiti te trawan e kon na den èn pe furutron yu e miti sma na oso? Kande yu man du dati leti na ini a kontren fu yu eigi gemeente. Fa so? Fu di yu e go na den wenkri nanga bisnispresi di de na ini a kontren dati. Furu tron, den preikiman di e gi kotoigi wenkri fu wenkri, abi bun bakapisi.
2. Fa wi kan seti sani fu preiki na ini bisnis kontren?
2 Na ini a kontren pe son gemeente musu preiki, yu abi bisnis kontren tu. A brada di e sorgu gi a heri kontren fu a gemeente kan seti spesrutu karta fu den birti pe furu wenkri de. Den birti pe sma e tan kan abi wan pisi fu a bisnis kontren na ini. Tapu den karta fu den kontren dati a musu de krin fu si taki preikiman no musu wroko na ini a bisnis kontren fu den birti dati. Na ini tra kontren, yu kan preiki na ini den birti pe sma e tan èn yu kan go na den wenkri tu. Efu noiti ete yu preiki na ini bisnis kontren, dan yu kan pruberi fu preiki na den pikin wenkri fosi.
3. San kan yepi wi fu abi bun bakapisi te wi e preiki wenkri fu wenkri?
3 Bigin a takimakandra na wan makriki fasi: Te yu e preiki wenkri fu wenkri, dan a de prenspari fu weri krosi neleki fa yu ben o du dati te yu ben o go na wan konmakandra na a Kownukondre zaal. A fiti tu fu go na wan ten pe furu sma no de na ini a wenkri. Efu a kan, dan go na ini a wenkri te nowan sma e wakti fu bai wan sani. Aksi efu yu kan taki nanga a basi, noso nanga a sma di e teki fesi. Hori a takimakandra syatu èn no taki fu sani di no de prenspari. San yu kan taki dan?
4-6. San wi kan taki te wi e preiki gi wan wenkriman, noso wan wenkri basi?
4 Te yu e taki nanga wan wenkriman, noso a basi, dan yu kan taki: „Sma di e du bisnis abi so furu fu du, taki wi no man miti den makriki na oso. Fu dati ede wi e kon na yu wrokope. Den tijdschrift fu wi e taki fu difrenti sani di e pasa na heri grontapu.” Baka dati, yu kan taki syatu fu wan penti fu a tijdschrift.
5 Noso, kande yu kan bigin wan makriki takimakandra na so wan fasi: „Furu sma wani sabi moro fu Bijbel, ma den no abi nofo ten. A traktaat disi e sori fa yu kan kisi bijbelstudie sondro fu pai, èn a studie disi sa yepi yu fu kisi piki tapu den Bijbel aksi di yu abi.” Baka dati yu kan sori go na bladzijde 4 nanga 5 fu a traktaat di nen Yu Ben Sa Wani Sabi Moro fu Bijbel?
6 Efu a sma di abi a frantwortu na ini a wenkri no abi furu ten fu arki, dan yu kan pristeri a traktaat na so wan fasi: „Wan tra leisi mi sa kon baka te yu abi pikinso moro ten. Mi ben sa wani sabi fa yu e prakseri fu a traktaat disi.”
7. Fa wi kan yepi sma na ini bisnis kontren te den wani kon sabi moro?
7 Yepi den wan di wani sabi moro: Yu man hori wan bijbelstudie na ini bisnis kontren tu. Wan spesrutu pionier ben tyari tijdschrift doronomo gi wan bisnisman. Di a man ben wani sabi moro fu den sani di a ben e leisi, dan a pionier ben gebroiki a San Gado e aksi-brochure fu sori en fa a studie e hori. Den bigin studeri leti drape pe a man e wroko. Fu di a pionier ben hori a situwâsi fu a man na prakseri, meki ibri leisi a ben studeri 10, noso 15 miniti. Na a srefi fasi wi wani tan suku den wan di warti, fu di wi e gi kotoigi na ini bisnis kontren.