No tapu yusrefi fu du moro—San yu kan du te yu abi furu fu du
1. Fu san ede son sma e draidrai fu abi wan Bijbelstudie?
1 Son sma e draidrai fu abi wan Bijbelstudie fu di den abi furu fu du. A e teki ten fu studeri Bijbel nanga wan sma. A e teki ten fu sreka wisrefi gi a studie, fu hori a studie, èn fu yepi a sma nanga wan tu problema di a abi. Na apostel Paulus ben taki dati a ben de klariklari fu lasi en libi so taki a ben man yepi den sma na ini Tesalonika fu kon sabi Yehovah (1 Tes. 2:7, 8). Fa wi kan hori wan Bijbelstudie srefi efu wi abi furu fu du?
2. Te wi lobi Yehovah, dan fa wi o gebroiki wi ten?
2 A e teki ten fu dini Yehovah: A tru taki a e teki ten fu dini Yehovah. Fu eksempre, a e teki ten fu go na den konmakandra, fu go na ini a preikiwroko, fu leisi Bijbel, èn fu begi. Wan sma di trow breiti fu meki ten gi en patna aladi a abi furu fu du. A no de fu taki dati wi o breiti moro fu gebroiki wi ten fu anbegi Yehovah fu di wi lobi en (Ef. 5:15-17; 1 Yoh. 5:3). Soleki fa Yesus taki, dan wan tumusi prenspari pisi fu wi anbegi na a wroko fu meki disipel (Mat. 28:19, 20). Te wi e hori den sani disi na prakseri, dan wi no o meki sani tapu wi fu teki a frantwortu fu hori wan Bijbelstudie.
3. Fa wi kan sorgu taki wan Bijbelstudie e go doro te a situwâsi fu wi kenki?
3 Ma san wi kan du te wi musu wroko, te wi siki langa, noso te wi musu du furu na ini a gemeente? Son preikiman di musu gowe wanwan leisi e gebroiki telefon noso Internet fu hori den Bijbelstudie. Den wan di siki langa, seti sani so taki a studenti kan kon na den oso fu studeri. Sonwan fu den seti sani so taki wan tra preikiman kan go studeri nanga a studenti te den no man du dati.
4. Sortu blesi wi o kisi te wi abi Bijbelstudie?
4 A ben gi Paulus furu prisiri fu gebroiki en ten nanga en krakti fu yepi tra sma fu kon sabi a tru leri (Tori 20:35). Di a ben prakseri ala den sma di a ben man yepi na ini Tesalonika, dan dati ben meki taki a taki Yehovah tangi (1 Tes. 1:2). Wi kan kisi moro prisiri na ini a diniwroko te wi no e meki den furu sani di wi abi fu du, tapu wi fu abi Bijbelstudie.