San kan yepi yu fu studeri ibri wiki
A MUILEK gi yu fu studeri Bijbel ibri wiki? Yu no e firi fu studeri son leisi fu di yu feni taki a no e gi yu prisiri? Kande wi alamala e firi so son leisi. Ma prakseri den tra sani di wi e du ibri dei, soleki a wasi di wi e wasi wi skin. A sani dati e teki ten èn wi musu sorgu taki wi e wasi wi skin bun. Ma a no de fu taki dati wi e firi moro bun te wi du dati. Te wi e studeri Bijbel, dan wi kan agersi dati nanga ’a wasi di wi wasi kon krin nanga a watra fu Gado Wortu’ di e meki wi firi bun baka (Ef. 5:26). Luku wan tu sani di kan yepi wi:
Meki wan schema. Wan fu „den moro prenspari sani” di wan Kresten musu du, na taki a musu studeri Bijbel (Fil. 1:10). Fu yepi yu fu no fergiti taki yu musu studeri, dan a bun fu skrifi a dei nanga a ten tapu wan pisi papira èn fu poti en na wan presi pe yu o man si en makelek. Noso kande yu kan poti wan alarm tapu yu telefon fu memre yu taki yu musu studeri.
Sabi san o yepi yu fu hori yu prakseri na a studie. San moro makelek gi yu? Fu eksempre, a moro makelek gi yu fu hori yu prakseri na a studie te yu e studeri wán yuru? Noso yu wani studeri wan moro syatu pisi ten, ma moro leisi? Yu sabi san moro bun gi yu. Sobun, hori disi na prakseri te yu o bepaal o langa yu wani studeri. Efu yu no e firi fu studeri na a ten di yu ben poti, dan kande yu kan pruberi fu studeri tin miniti nomo. Awinsi yu e studeri tin miniti nomo, tòg yu kan leri furu sani. Èn te yu bigin, a kan taki yu o wani studeri go doro.—Fil. 2:13.
Besroiti na fesi san yu o studeri. Efu yu e wakti teleki yu musu studeri fu besroiti san yu o studeri, dan a kan taki yu ’no e gebroiki a ten fu yu na wan koni fasi’ (Ef. 5:16). Kande yu kan meki wan lijst fu den artikel noso fu den tori di yu ben o wani studeri. Fu eksempre, efu yu ben o wani sabi wan sani di yu no e ferstan so bun, dan skrifi na aksi dati tapu a lijst fu yu. Na so ibri leisi te yu kba studeri, yu o abi tra sani fu studeri wan tra leisi.
Tyari kenki kon te dati de fanowdu. San moro prenspari, na taki yu e studeri ibri wiki. Dati meki a kan de fanowdu son leisi taki yu e kenki a dei nanga a ten di yu e studeri, o langa yu e studeri, noso den tori di yu e studeri.
Te wi e studeri ibri wiki, dan wi o kisi wini fu dati. Wi o kon moro krosbei na Yehovah, wi o leri fu teki bun besroiti na ini wi libi, èn wi o kisi krakti baka.—Yos. 1:8.