„Preiki finifini”
1. San wi kan leri fu a fasi fa na apostel Paulus ben e du a diniwroko?
1 „Du yu wroko finifini” (2 Tim. 4:5). Nanga wan krin ati na apostel Paulus ben gi Timoteyus a rai dati. Te yu luku en bun, dan na ini a pisi ten fu a yari 47 te go miti a yari 56, na apostel Paulus ben du a zendelingwroko dri leisi kaba. A buku Tori fu den apostel e taki furu leisi dati Paulus ben „preiki finifini” (Tori 23:11; 28:23). Fa wi kan du a srefi na ini a ten disi?
2. Fa wi kan preiki finifini te wi e go oso-fu-oso?
2 Te wi e go oso-fu-oso: Te wi wani miti sma di noiti no yere a bun nyunsu, dan wi musu go na den na difrenti ten. Kande a papa de na oso mofoneti noso tapu satra nanga sonde. Wi musu meki muiti fu taki nanga ibri ososma èn wi musu tan go baka na den sma di wi no miti na oso. San yu kan du te yu no miti nowan sma na oso? Kande a o abi bun bakapisi te yu e seni wan brifi gi a sma noso te yu e bel en.
3. Sortu okasi yu e suku fu man preiki finifini?
3 Preiki pe furu sma de èn na ibri okasi: Na ini a ten disi den futuboi fu Yehovah wani taki ala sma yere a „trutru koni” fu Gado. Son leisi den e preiki „na strati” noso „na den pren” (Odo 1:20, 21). A de so taki te wi e du den aladei sani fu wi, wi de na ai fu preiki gi sma? Wi e „preiki a wortu fu Gado fayafaya”? (Tori 18:5) Te wi e du dati, dan wi e du san Bijbel e taki fu „preiki finifini”.—Tori 10:42; 17:17; 20:20, 21, 24.
4. Te wi e begi Gado èn e denki dipi fu sani, dan fa disi o yepi wi fu man preiki finifini?
4 Son leisi wi e draidrai fu preiki gi sma, fu di wi abi wan swakifasi noso fu di wi e syen. A no de fu taki dati Yehovah sabi san wi man du noso san wi no man du (Ps. 103:14). Ma toku son leisi te wi e draidrai fu preiki, dan wi kan begi Gado fu gi wi deki-ati fu man taki sondro frede (Tori 4:29, 31). Boiti dati te wi e studeri Gado Wortu èn te wi e denki dipi fu en, dan wi e kisi moro warderi gi a bun nyunsu di warti moro ala sani (Fil. 3:8). Disi o gi wi deki-ati fu preiki fayafaya.
5. San wisrefi kan du fu yepi meki a profeititori fu Yoèl kon tru?
5 A profeititori fu Yoèl ben taki na fesi taki fosi a bigi dei fu Yehovah o kon, a pipel fu Gado ben o „go doro” nanga a preikiwroko èn den no ben o meki noti tapu den fu du dati (Yoèl 2:2, 7-9). Meki wi du ala san wi man fu du a wroko disi, di noiti no o du moro.