Yu o go na ini a yepi-pionierwroko?
1. Fu san ede a pisi ten fu a Memrefesa na wan bun ten fu du moro na ini wi diniwroko?
1 A pisi ten fu a Memrefesa na wan bun ten fu du moro na ini wi diniwroko. Na a ten dati wi e prakseri a bigi lobi di Yehovah sori wi di a meki en Manpikin dede gi wi leki wan lusu-paiman (Yoh. 3:16). Disi o meki taki wi kisi moro warderi èn wi o abi na angri fu fruteri tra sma fu Yehovah èn den sani di a e du gi libisma (Yes. 12:4, 5; Luk. 6:45). Disi na a ten tu te wi o du a spesrutu wroko fu gi mati nanga trawan na ini wi kontren wan kari fu kon na a Memrefesa. Baka dati, wi sa meki muiti fu yepi den sma di kon na a Memrefesa, fu kon sabi moro fu Gado. Yu o du a yepi-pionierwroko fu du moro na ini maart, april noso mei?
2. Fu san ede maart na wan heri bun mun fu du a yepi-pionierwroko?
2 Meki maart de wan spesrutu mun: Maart na wan heri bun mun fu du a yepi-pionierwroko. Den sma di o go na ini a yepi-pionierwroko kan wroko 30 noso 50 yuru. Efu a kring-opziener o kon na ini yu gemeente na ini maart, dan den yepipionier kan de na a heri konmakandra di a o hori nanga den gewoon pionier nanga den spesrutu pionier. Wi abi moro ten now leki den yari di pasa fu gi sma wan kari fu kon na a Memrefesa na tapu 26 maart 2013. Wi o bigin 1 maart. Boiti dati maart abi feifi satra nanga sonde. A ben o bun fu prakseri seryusu efu yu man meki a mun disi de wan spesrutu mun na ini a yari.
3. Fa wi kan seti sani fu du moro na ini a diniwroko?
3 Sreka nownow: Now na a ten fu luku efu yu kan seti sani, so taki yu o man go pionier. A prenspari fu wroko makandra leki osofamiri. Sobun, gebroiki na Osofamiri Anbegi fu taki fu den marki di na osofamiri fu yu wani doro èn meki wan schema (Odo 15:22). No lasi-ati efu yu no man du a yepi-pionierwroko. Yu kan seti sani so taki yu man wroko moro langa na ini a preikiwroko? Yu kan go na ini a diniwroko ete wan dei na ini a wiki?
4. Sortu wini wi o kisi te wi e du moro na ini maart, april nanga mei?
4 Te wi e du moro na ini maart, april nanga mei, dan wi sa abi moro prisiri fu di wi e dini Yehovah èn fu di wi e yepi trawan (Yoh. 4:34; Tori 20:35). A moro prenspari sani na taki wi o prisiri na ati fu Yehovah, fu di wi e du ala san wi man fu du a diniwroko.—Odo 27:11.