A spesrutu wroko fu kari sma kon na a Memrefesa o bigin na tapu 1 maart
1. O ten wi sa bigin prati den kari gi a Memrefesa èn fu san ede a de pikinso moro langa a yari disi?
1 Na tapu freida 1 maart, wi o bigin nanga wan spesrutu wroko fu kari sma fu kon nanga wi na a Memrefesa. A Memrefesa o de na tapu 26 maart. Fu dati ede a spesrutu wroko o de pikinso moro langa leki den yari na fesi. Na so fasi, moro sma o man kisi wan kari, spesrutu te den e libi na ini a birti fu wan gemeente di abi wan bigi kontren fu preiki.
2. Fa sani seti so taki wi kan kisi den kari gi a Memrefesa èn fu wroko a heri kontren?
2 Sreka sani: Den owruman o seti sani fa fu wroko a heri kontren èn den o taigi wi efu wi musu libi den kari na a oso fu wan sma di no de. Efu den kari tan abra te wi du na oso-fu-oso-wroko na ini a kontren, dan den preikiman kan prati den kari disi na tra okasi pe sma de. A dienst-opziener o sorgu taki nofo kari de di abi na adres nanga a ten na tapu. A musu poti disi na a buku noso tijdschrift tafra so taki den preikiman kan teki den, ma a no musu poti ala den kari wantewante. Wi musu teki soso san wi abi fanowdu gi wan heri wiki.
3. San wi musu hori na prakseri te wi e prati den kari?
3 San wi o taki? A bun fu taki syatu, so taki wi kan miti moro furu sma. Bladzijde 4 abi wan eksempre fa wi kan pristeri a kari na ini a kontren fu wi. Ma wi no musu gowe esi-esi efu na ososma e sori switifasi noso efu a wani sabi moro. Te wi e preiki tapu satra noso sonde, wi musu pristeri den tijdschrift efu dati fiti. Na tapu 2 maart wi o poti prakseri fu gi sma wan kari, na presi fu bigin Bijbelstudie.
4. Fu san ede wi musu du a spesrutu wroko disi fayafaya?
4 Wi howpu taki furu sma o de nanga wi na a Memrefesa. A lezing o sori wi suma na Yesus trutru (1 Kor. 11:26). A o sori wi tu fa a dede fu en o yepi wi (Rom. 6:23). Boiti dati, a o tyari kon na krin fu san ede a de prenspari fu memre en (Yoh. 17:3). Meki wi du a spesrutu wroko disi fayafaya!