Gebroiki a Bun nyunsu-brochure fu gi sma leri
1. Fa a Bun nyunsu-brochure meki?
1 Soleki fa wi ben taki na ini Wi Kownukondre diniwroko fu yuli, dan wan prenspari wrokosani di wi e gebroiki fu gi sma leri na a brochure Gado abi bun nyunsu gi wi! A brochure disi skrifi na so wan fasi taki na ososma kan leri sani langalanga fu Bijbel fu di a o abi fu suku den tekst di kari. Nofo tron den buku di wi e gebroiki fu studeri nanga sma meki na so wan fasi taki a sma kan leisi en èn leri moro fu Bijbel sondro taki wan tra sma yepi en. Ma a brochure disi meki tra fasi fu di na ososma o abi wan leriman fanowdu fu yepi en. Sobun, te wi e pristeri a brochure disi, dan wi musu pruberi fu sori na ososma fa wi e studeri nanga sma èn o moi a de fu kon sabi a bun nyunsu fu Bijbel.—Mat. 13:44.
2. Fa wi kan gebroiki a Bun nyunsu-brochure a fosi leisi te wi miti wan sma?
2 A fosi leisi te yu miti wan sma: Yu ben kan taki: „Mi de dyaso fu di sma e broko den ede nanga den sani di e pasa na grontapu. Yu denki taki sani o kon moro bun? [Gi a sma na okasi fu piki.] Bijbel abi bun nyunsu di kan gi wi howpu. Dyaso yu kan si wan tu fu den aksi di Bijbel e piki.” Gi na ososma a brochure èn meki a sori yu sortuwan fu den aksi na a bakasei kafti a feni moi. Dan gebroiki a fosi paragraaf fu a les dati fu sori en fa wi e studeri nanga sma. Wan tra sani di yu kan du na taki yusrefi e poti wan moi aksi di abi fu du nanga wan fu den les. Baka dati sori en fa a brochure kan yepi en fu si fa Bijbel e piki na aksi. Efu wan felem de tapu jw.org di abi fu du nanga a les dati, dan son preikiman e prei dati tu gi a sma.
3. Fruteri fa yu kan gebroiki a Bun nyunsu-brochure fu hori wan Bijbelstudie.
3 Fa fu hori a studie: (1) Leisi na aksi di abi wan nomru èn di skrifi nanga fatu letter fu yepi na ososma fu poti prakseri na a moro prenspari sani. (2) Leisi a paragraaf na ondro na aksi. (3) Leisi den Bijbeltekst di skrifi skoinsi èn poti wan tu aksi di fiti fu yepi na ososma fu frustan fa Bijbel e piki na aksi di unu leisi kaba. (4) Efu ete wan paragraaf de na ondro na aksi, dan du baka san skrifi na penti 2 nanga 3. Efu wan felem de di abi fu du nanga na aksi dati, dan yu kan sori a sma a felem. (5) Fu si efu na ososma frustan a tori, dan aksi en fa a ben o piki na aksi di skrifi nanga fatu letter.
4. San o yepi wi fu gebroiki a brochure disi bun?
4 Kon sabi san skrifi na ini a brochure disi. Gebroiki en na ibri okasi di fiti. Fosi yu go studeri nanga wan sma, denki san na a moro bun fasi fu taki-go-taki-kon nanga en èn gebroiki den Bijbeltekst fu a les (Odo 15:28; Tori 17:2, 3). O moro yu e gebroiki a brochure disi, o moro yu o sabi fa fu wroko nanga en. Te fu kaba disi kan tron wan fu den wrokosani di yu lobi gebroiki fu leri sma den tru tori fu Bijbel!