Libisma o man seti na ekonomia na wan eerlijk fasi?

Na ini furu kondre sma e go na strati fu protesteer fu di den feni taki na ekonomia fu a kondre fu den no e drai bun. A COVID-19 siki di panya na ala sei, meki taki den problema disi kon moro ogri. Sma no de tevrede fu di a kondre fu den de na ini lockdown, sma no abi nofo nyanyan nanga tra prenspari sani èn furu sma no man kisi nofo datrayepi. A situwâsi disi sori moro krin taki wan bigi difrenti de na mindri gudusma nanga pôtisma.

Den ekonomia problema di e meki furu sma pina o kaba wan dei? Iya. Bijbel e sori san Gado o du fu lusu den problema fu wi.

Ekonomia problema di Gado o lusu

A problema: Libisma no man seti na ekonomia na so wan fasi taki ala sma kisi san den abi fanowdu.

A lusu: Gado o puru ala libisma regering èn a o poti en eigi regering di Bijbel e kari a Kownukondre fu Gado. A de na ini hemel èn a o tiri heri grontapu.—Danièl 2:44; Mateyus 6:10.

A bakapisi: Fu di Gado Kownukondre o tiri heri grontapu, meki a o man seti ala sani bun. Noiti moro sma o pina èn nowan sma o frede taki a no o abi nofo nyanyan (Psalm 9:7-9, 18). Na presi fu dati den o nyan bun fu a tranga wroko fu den èn den o abi wan koloku libi nanga den osofamiri. Bijbel e pramisi: „Den o bow oso èn den srefi o tan na ini. Den o prani droifidyari èn den srefi o nyan fu en. Den no o bow oso, dan wan tra sma go tan na ini. Den no o prani sani, dan wan tra sma nyan fu dati.”—Yesaya 65:21, 22.

A problema: Libisma no man lon gi situwâsi di e meki sma pina.

A lusu: Nanga yepi fu en Kownukondre, Gado o puru ala sani di e meki sma frede èn di e gi den broko-ede.

A bakapisi: Te Gado o tiri grontapu, dan nowan sani o pasa di o meki taki sma lasi den sani di den abi fanowdu fu tan na libi. Fu eksempre, feti, angriten, nanga siki di e panya na ala sei no o de moro (Psalm 46:9; 72:16; Yesaya 33:24). Gado e taki: „Mi pipel o tan na ini oso pe den e firi bun. Den no o bruya, èn nowan sma o kon muilek den na a presi pe den e tan.”—Yesaya 32:18.

A problema: Furu tron sma di e prakseri densrefi nomo èn di gridi e meki trawan wroko tranga gi den sondro fu pai den nofo.

A lusu: Te Gado Kownukondre o tiri, dan sma o leri fu lobi trawan moro leki densrefi.—Mateyus 22:37-39.

A bakapisi: Te Gado Kownukondre o tiri, dan ala sma o teki na eksempre fu Gado èn den o sori lobi di „no e suku en eigi bun” (1 Korentesma 13:4, 5). Bijbel e taki: „Den no o du nowan ogri èn den no o pori nowan sani na mi santa bergi, fu di heri grontapu o furu nanga a sabi fu Yehovaha, neleki fa a se furu nanga watra.”—Yesaya 11:9.

Bijbel e sori taki wi e libi na ini den lasti dei fu a grontapu disi èn taki heri esi Gado o tyari wan kaba na ala moni problema soleki fa a pramisib (Psalm 12:5). Ma fosi dati pasa, den rai di skrifi na ini Bijbel kan yepi yu nanga den moni problema di yu abi now. Fu eksempre, luku den artikel „Rondkomen met minder” nanga „Hoeveel waarde hecht u aan geld?”

Fowtu denki di sma abi fu Bijbel nanga monitori

San son sma e taki: Pôti sma o de na grontapu ala ten, bika Yesus ben taki: „Den pôti sma de nanga unu ala ten.”—Mateyus 26:11.

Fa sani de trutru: Yesus ben taki nomo fa sani de. Solanga a grontapu disi de yu o abi pôti sma. Ma a boskopu di Yesus ben preiki ben de „bun nyunsu” gi den pôti sma, fu di a ben pramisi taki Gado Kownukondre o sorgu taki sma no o pina noiti moro.—Lukas 4:18, 43.

San son sma e taki: Efu sma wani plisi Gado, dan den musu de pôti, bika Yesus ben taki: „Go seri den sani di yu abi. Prati a moni gi den pôti sma.”—Mateyus 19:21.

Fa sani de trutru: Nanga den wortu disi Yesus no ben taki dati den disipel fu en no ben mag abi gudu. Ma a ben gi wan yonguman rai fu di a man disi ben meki den gudu fu en puru en prakseri na den prenspari sani. Yesus gi en a rai fu no libi nanga tumusi furu gudu èn a aksi a man disi fu tron wan disipel fu en.

San son sma e taki: Gado e blesi sma nanga gudu bika Bijbel e taki: „A blesi fu Yehovah, na dati e meki sma kon gudu.”—Odo 10:22.

Fa sani de trutru: Te Bijbel e taki fu „a blesi fu Yehovah”, dan nofo tron dati e sori go na sani soleki wan koloku libi, wan bun matifasi nanga Gado èn wan moi howpu gi a ten di e kon (Psalm 25:14; Yohanes 17:3). Aladi Gado ben blesi sonwan fu den futuboi fu en nanga gudu, toku furu sma di ben tron Kresten no ben gudu (Genesis 24:34, 35; Yakobus 2:5). Srefi Yesus Krestes no ben abi furu gudu.—Mateyus 8:20.

San son sma e taki: Te luku en bun, dan Bijbel e leri wi fu libi leki communist-sma, fu di a e taki fu den fosi Kresten: Den „ben prati ala san den ben abi nanga makandra. Den ben e seri den gron fu den èn ala sani di den ben abi.”—Tori fu den apostel 2:44, 45.

Fa sani de trutru: Den vers disi e taki fu wan sani di den fositen Kresten ben seti gi wan syatu pisi ten fu yepi sonwan fu den nyun sma di ben dopu. Den sma disi ben kon na Yerusalem fu de na a Pinksterfesa fu den Dyu (Tori fu den apostel 2:5). Ma di den tron Kresten, den tan moro langa na ini Yerusalem leki san den ben denki, fu di den ben wani leri moro fu a Kresten bribi. Dati meki tra Kresten sorgu taki den sma disi ben abi nyanyan nanga wan tanpresi.—Tori fu den apostel 2:41, 42, 46, 47.

a Yehovah na a nen fu Gado soleki fa Bijbel e sori.—Psalm 83:18.

b Efu yu wani sabi fu san ede yu kan frutrow Bijbel, dan luku na artikel, „Yu kan de seiker taki den tori na ini Bijbel tru.”