Fu san ede so furu bita-ati de?​—⁠San Bijbel e taki?

Nyunsu lai nanga ogr’ati sani di sma e taki fu trawan èn ogri di sma e du nanga trawan fu di den de fu wan tra ras noso fu di den abi bita-ati gi den.

• „A heri feti na Israel nanga Gaza meki taki furu sma tapu social media e taki ogr’ati sani fu trawan èn den e gi trawan dek’ati fu du ogri noso fu taki ogri sani.”​—The New York Times, 15 november 2023.

• „Sensi 7 oktober, wi si fa moro nanga moro sma na heri grontapu e taki ogri fu trawan. Wi si tu taki den e du ogr’ati sani fu di den abi bita-ati gi trawan.”​—Dennis Francis, president fu na Algemene Vergadering van de Verenigde Naties, 3 november 2023.

A no tide taki sma e taki ogr’ati sani fu trawan, den e du ogri èn den e feti. Bijbel e taki fu sma na ini owruten di ben e feti èn di ben e du ogr’ati sani tu (Psalm 64:3; 120:7; 140:1). Ma Bijbel e sori taki den ogri sani di e psa now, abi fu du nanga wan prenspari sani.

Sma abi bita-ati gi makandra na ini a ten disi

Bijbel e taki fu tu reide fu san ede so furu bita-ati de na ini a ten disi.

1. 1. Bijbel ben taki fu wan ten te „a lobi fu furu sma o kon kowru” (Mateyus 24:12). Na presi taki sma lobi makandra, den ben o abi fasi di meki den abi bita-ati gi makandra.​—2 Timoteyus 3:1-5.

2. 2. Na ini a ten disi ogri nanga bita-ati de na ala sei fu di na Satan Didibri e tiri a grontapu disi èn a abi a makti fu meki sma du den ogri disi. Bijbel taki dati „heri grontapu de na ini a makti fu na ogriwan”.​—1 Yohanes 5:19; Openbaring 12:9, 12.

Ma Bijbel e taki tu dati dyonsro Gado o puru den sani di e meki taki sma abi bita-ati gi makandra. Ma a no dati w’wan a o du. Gado o puru ala a pen nanga a sari fu sma di pina fu den ogri disi. Bijbel e pramisi:

• Gado „o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”​—Openbaring 21:4.