Skrifi brifi gi trawan
BRIFI yepi milyunmilyun libisma fu libi wan moro bun libi èn fu tyari densrefi moro bun. Furu fu den buku fu den Kresten Griki Buku fu Bijbel, ben de brifi. Na ini a ten disi wisrefi kan skrifi brifi fu gi nyun bribiman deki-ati, fu no lasi kontakti nanga den mati fu wi, èn fu gi brada nanga sisa deki-ati te den teki wan tra spesrutu sortu diniwroko na den tapu. Wi kan skrifi brifi tu fu gi sma krakti di abi problema nownowde. Èn brifi kan skrifi tu fu fruteri den brada san den musu du so taki sani waka bun na ini a gemeente.—1 Tes. 1:1-7; 5:27; 2 Petr. 3:1, 2.
Wi kan gi kotoigi na wan bun fasi tu, te wi e skrifi brifi. Na wan tu presi na foto, yu abi wan tu oso pe yu no kan go makriki leki kotoigi, èn dati meki a muilek fu preiki gi den sma di e tan drape. Wan tu tra sma no de na oso furu, sobun wi no man miti den te wi e waka oso fu oso fu gi kotoigi. Trawan baka e libi na bun fara presi pe a muilek fu doro drape.
Sontron yusrefi musu tan na oso, soleki te yu siki, te alen e fadon bun tranga, noso te wan avondklok poti na ini a kondre. Yu kan gebroiki a ten disi fu skrifi brifi fu gi kotoigi? Kande yu ben abi na okasi fu gi kotoigi na wan famiri fu yu, noso wan tra sma di yu ben miti. Yu kan skrifi wan brifi now fu yepi den moro fara? Wan fu den bijbelstudenti fu yu froisi? Te yu skrifi en wan brifi, dan dati kan de soifri san a abi fanowdu fu a no lasi a firi di a abi gi a waarheid. Noso kande yu kan skrifi wan brifi fu fruteri wan tu sani fu Bijbel na wan sma di yu sabi èn di trow, di tron papa noso mama, noso di lasi wan lobiwan fu en na ini dede.
Skrifi brifi fu gi kotoigi
Te yu o skrifi wan brifi fu gi kotoigi na wan sma di noiti yu miti ete, dan a fosi sani di yu musu du na taigi en suma na yu. Kande yu kan fruteri taki yu e teki prati na wan wroko di e du na heri grontapu èn di yu nanga trawan e du sondro fu kisi pai gi dati. Efu yu denki taki a bun fu du dati, dan kande yu kan skrifi tu taki yu na wan Kotoigi fu Yehovah. Meki a sma sabi fu san ede yu no kon na en oso, ma na presi fu dati, yu e skrifi en wan brifi. Te yu e skrifi a brifi, dan yu musu skrifi neleki a sma de drape nanga yu fu taki nanga yu. Ma no frigiti fu ’luku bun neleki sneki, ma toku de leki doifi di no e du ogri’, èn fu dati ede, prakseri seryusu o furu yu o fruteri a sma fu yusrefi.—Mat. 10:16.
Na ini a brifi di yu o skrifi, yu musu skrifi tu san yu ben o taki efu yu ben o man miti en na en oso. Kande yu kan gebroiki wan fu den sani fu a pikin buku Fa foe bigin èn go doro nanga bijbel takimakandra? noso yu kan gebroiki wan fu den bijbeltekst di wi e kisi fu pristeri èn di komoto fu Wi Kownukondre diniwroko. Kande yu kan poti wan aksi na ini a brifi, èn gi a sma deki-ati fu go denki fu na aksi dati. A wan-enkri sani di wan tu preikiman e du, na fu taki dati wi seti sani fu gi sma piki tapu Bijbel aksi, sondro fu den sma abi fu pai gi dati. Baka dati den e skrifi wan tu nen fu den kapitel fu wan fu den buku fu wi, di wi e gebroiki fu studeri nanga sma. Wan eksempre fu gi kotoigi nanga wan brifi de fu feni na tapu bladzijde 73. Na eksempre disi kan yepi yu si fa yu musu skrifi so wan brifi, ma a bun sontron fu kenki den sani di yu e skrifi na ini a brifi. Efu yu no e du dati, dan baka wan pisi ten, den sma o kisi wan srefi sortu brifi ala leisi baka.
Wan tu sma no wani leisi langa brifi di komoto fu wan sma di den no sabi srefisrefi. Sobun, yu ben sa du koni fu no skrifi wan langa brifi, ma fu hori en syatu. Efu a brifi fu yu langa tumusi, dan a sma di o leisi yu brifi, kan kon weri fu a brifi, fosi a kaba leisi a heri brifi. A ben sa bun fu seni wan pisi papira tu di e gi en a kari fu kon na den konmakandra na a Kownukondre zaal. Kande yu kan seni wan tra sani makandra nanga a brifi di yu e skrifi, soleki wan traktaat, wan brochure, noso A Waktitoren, èn yu kan fruteri a sma taki a kan kisi den sani disi ala ten baka, efu a wani. Noso kande na ini a brifi yu kan aksi a sma efu yu kan kon na en oso fu taki moro fara fu a tori.
Wan tu sani fu a fasi fa a brifi musu de
Luku a brifi di wi gi leki wan eksempre. Luku den efu yu e si den sani disi: (1) A brifi seti moi, a no morsu èn a no flaka. (2) Srefi efu a sma lasi na enveloppe, toku a kan si a nen fu a sma di skrifi a brifi nanga a presi pe a sma dati e tan, fu di dati skrifi tapusei fu a brifi. (3) Na ini a fosi paragraaf a skrifi krinkrin fu san ede a brifi skrifi. (4) Ibri prenspari sani de fu feni na ini wan tra paragraaf fu a brifi. (5) Fu di a skrifiman fu a brifi hori na prakseri fu san ede a brifi skrifi, meki a no skrifi a brifi leki en nanga a sma na speri, ma a no skrifi en na wan tumusi seryusu fasi tu.
Ma wan moro seryusu brifi kan skrifi tu, dati na fu eksempre te a gemeente sekretarsi ben o seni wan brifi go na a bijkantoro. Na ini so wan brifi dan a sekretarsi musu skrifi a nen fu a gemeente, sosrefi en eigi nen leki sekretarsi, pe a e tan, nanga a dei di a skrifi a brifi. A nen fu a sma noso na organisâsi gi suma yu e seni a brifi, musu skrifi na ini a brifi tu. Baka dati dan yu e taki odi na wan fasi di fiti. Na ini wan tu tongo den e skrifi sani soleki „Nanga ala lespeki” na a kaba fu a brifi, dan den e skrifi den nen ondrosei fu a brifi. A nen di yu e poti, yu musu skrifi nanga yu eigi anu.
Na ini ibri brifi di yu e skrifi, luku taki yu e skrifi sani soifri leki fa dati e skrifi na ini a tongo fu yu, èn sorgu sosrefi taki a brifi luku moi èn taki a no abi nowan flaka. Efu yu e du dati, dan dati sa yepi a sma di e leisi a brifi fu abi lespeki gi den sani di skrifi na ini a brifi.
Na tapu na enveloppe yu musu fu skrifi pe yu e tan, so taki a sma abi wan okasi fu seni wan brifi kon baka gi yu. Efu yu firi taki a no bun fu skrifi pe yu e tan, bika yu no sabi a sma di yu e gi kotoigi, dan kande yu kan aksi den owruman efu den feni en bun fu a sma skrifi go na a Kownukondre zaal. Noiti yu musu skrifi na tapu na enveloppe a presi pe a bijkantoro de, bika dati kan meki den sma denki taki na a bijkantoro seni so wan brifi kon, èn dati ben sa kan tyari bruya kon ini a tori. Efu yu seni buku gi a sma, ma yu no skrifi a presi pe a sma kan seni wan brifi gi yu baka, dan dati no ben sa bun tu, bika dan a sma ben kan go denki taki na a bijkantoro seni den sani dati gi en.
Sorgu taki yu pai nofo moni fu seni a brifi gowe, spesrutu te yu e seni buku tu nanga a brifi. Memre taki na ini furu kondre, te wan buku noso wan tijdschrift e seni gowe makandra nanga a brifi, dan yu sa musu pai moro leki te yu ben o seni a brifi wawan gowe.
A sma musu firi bun te a e leisi a brifi
Te yu kaba skrifi a brifi fu yu, dan leisi en ete wan leisi fu si san yu skrifi. Fa yu e firi te yu e leisi a brifi? Yu feni taki a e meki yu firi switi? Yu feni taki yu no skrifi sani di kan hati a sma? Te wi de nanga tra sma, dan wi e meki muiti fu sori den wan tu bun fasi, soleki lobi nanga switifasi (Gal. 5:22, 23). Efu yu no e firi switi te yu e leisi a brifi, noso efu a gersi leki yu e sori go soso tapu sani di no e waka bun, dan gebroiki tra wortu fu skrifi a brifi.
Wan brifi kan go na presi pe yusrefi no man go. Soso a sani disi kaba, e meki taki wan brifi na wan kefalek bun wrokosani gi a diniwroko. Fu di a brifi fu yu e sori suma na yu èn sortu sani warti gi yu, dati meki yu musu prakseri bun san yu o skrifi ini a brifi, fa a brifi de, èn fa yu e firi te yu e leisi a brifi. A brifi fu yu kan de soifri san de fanowdu fu meki wan bun sma bigin waka na tapu a pasi di e tyari en go na a libi, noso fu gi en deki-ati fu tan na tapu a pasi dati.