Aksi di opo kon

◼ Fu san ede a de fanowdu fu luku bun te wi e preiki gi tra sma nanga yepi fu brifi?

A preiki gi tra sma nanga yepi fu brifi de langa ten kaba wan bun fasi fu prati a bun nyunsu. Ma sani di pasa na grontapu no so langa ete meki taki sma e frede now fu opo brifi di e kon fu sma di den no sabi. Efu den kisi brifi fu sma di den no sabi, noso efu a tanpresi fu a sma di seni a brifi, no skrifi na tapu, dan furu tron sma e tweifri fu opo den brifi disi. Èn sma o frede moro srefi fu opo wan brifi, efu a sma di seni a brifi, skrifi nanga pen na tapu èn efu a brifi bigi noso hebi tumusi. Den ososma kande o trowe den brifi disi sondro fu opo den. San wi kan du fu no meki disi pasa?

Efu a kan, dan skrifi a brifi èn den sani na tapu na envelop nanga yepi fu wan skrifimasyin. A nen fu na ososma musu skrifi na tapu a brifi. Yu no musu seni wan brifi di skrifi na tapu: „A sma di e libi na ini na oso”. Boiti den sani disi, yu musu skrifi ala ten na tapu na envelop a presi pe na ososma kan seni en brifi go efu a wani skrifi kon baka. Efu a no de so wan koni sani fu skrifi a strati nanga nomru fu yu na tapu a brifi, dan yu kan skrifi yu nen nanga a strati nanga nomru fu a Kownukondre zaal. Yu no musu seni brifi go sondro taki yu skrifi yu nen na tapu na envelop. Noiti no skrifi a strati nanga a nomru fu a bijkantoro na tapu a brifi.—Luku Aksi boksoe ini Wi Kownoekondre Dienst fu november 1996.

Wi kan feni moro rai ini studie 17, paragraaf 7-9 fu a buku Handleiding voor de Theocratische Bedieningsschool. Den rai disi sa yepi wi fu gebroiki brifi na wan bun fasi fu meki tra sma kon sabi a bun nyunsu.